A condena e ex-director di e Slotervaart Ziekenhuis di Amsterdam na 18 luna di prizon den e Hogerberoep contra su condena. Di nan, seis luna ta condicional. Anteriormente corte lo a dun’e 15 luna. El a apela.
Corte di apelacion di Amsterdam ta sigui considerando proba cu Aysel Erbudak a malversa un miyon Euro for di Slotervaart Ziekenhuis na 2008, entre otro cos cu factura falso. E cantidad aki a bay para na un proyecto priva na Turkia. Tambe el a cumpra accion den un proyecto di salud electronico cu placa di e hospital na 2011, segun corte. E accionnan aki a bay para na un empresa caminda e y su yiunan tabata accionista.
Corte a considera cu Erbudak lo mester a haya un condena di 20 luna di prizon. Pero e caso a dura demasiado largo y esey no tabata culpa di e ex-director. Por lo tanto, esaki a tene na cuenta di e duracion di e condena. Corte tampoco ta considera necesario prohibi’e sigui ta director di un empresa. Esey ta debi tambe cu a dun’e un condena di prizon suspendi cu un periodo di prueba di tres aña.
Abuso di confiansa den sistema di salud
Corte ta considera cu Erbudak a abusa di e confiansa den e sistema di salud. Erbudak tabata director di Slotervaart Ziekenhuis di Amsterdam New West entre 2006 y 2013. E placa tabata destina na proporciona atencion medico n’e personanan enfermo, segun corte den e sentencia. Door di haci esaki, Erbudak a parce di tin wowo solamente pa su propio beneficio. A declara e hospital den bancarota na 2018.
E caso a surgi un poco despues di su retiro na 2013, cu a sigui e conflictonan dentro di e hospital. E casonan civil a laga Erbudak mas despues cu un debe miyonario y finalmente a declar’e personalmente den bancarota.
Rol cu Aruba
Mester menciona cu Aysel Erbudak ta pareha of casa di ex-Minister dr. Richard Visser. Despues di su funcion como mandatario na Aruba, Visser a bay biba cu Erbudak na Hulanda y Turkia. Cu e sentencia di awe, e señora lo mester sinta por lo menos un aña cera den prizon.
