E departamento di Jeugd en Zeden Politie, riba ordo di Fiscal di Ministerio Publico a dicidi awe di encarcela un mucha muhe di apenas 13 aña di edad. E tabata envolvi den un pelea recientemente. Con serio e pelea aki tabata, no ta conoci, pero husticia a opta pa atende e asunto aki cu man duro. E victima di e agresion a opta pa entrega un keho na Polis, kende no a duda den tuma e caso mesora y a start un investigacion penal contra e sospechoso.

Probablemente ta pa manda un señal na hobennan cu bringamento ta prohibi y ta un acto castigabel pa ley. Si den pasado a pensa cu un pelea ta traduci den strafwerk na scol so, awor por mira cu e otro banda di e pelea por opta pa keha Bo y Polis ta actua mesora, hasta uzando prizon si e pelea ta asina serio y e investigacion ta rekeri esey.

Riba e foto por mira momento cu a caba di interoga e hoben na Warda di Polis di Oranjestad, unda e oficina di JZP ta situa. E personal di Cuerpo Especial Arubano, encarga cu transporte di detenidonan, a hiba e mucha pa un otro Warda di Polis unda e ta keda encarcela mientras cu e investigacion ta andando. Esaki ta sosode net den dianan crucial di scol, unda tin e ultimo CP y Proefwerknan pa por cera puntonan riba rapport final.

Su mama a declara na nos cu e yiu ta victima di bullying constantemente y su scol, La Salle College, no ta haci nada. Su tata a conta mas den detaye cu ta un otro mucha muhe a maltrata su yiu cu mokete te mand’e for di tino. Asina mes awo a detene su yiu, cu den bista di e tata, tabata un victima den e pelea.

Ta di lamenta cu hobennan no ta realisa cu nan actonan di awe, lo tin repercucion y consecuencia pa henter nan bida. Dor di un problema na scol, cu a bay for di man, awor ta encarcela y ta mancha su nomber cu husticia.

Comments

comments