E dos sindicatonan mas grandi representando docentenan, esta SIMAR y SEPPA no ta para riba e mesun liña. No awo despues di e reunion cu Minister Rudy Lampe sino desde e prome dia cu e mandatario a menciona su idea pa independisa scolnan publico bou di un fundacion. Ta parce cu e Minister di RED ta bay haya masha contratiempo pa convence su coleganan di coalicion MEP y POR riba e tema delicado aki.
Awe a nota un cantidad di comentario di docentenan despues di a atende e reunion cu Minister Lampe. Ningun di nan a keda satisfecho y tur ta insisti cu e idea aki no ta bon y no ta teniendo e alumno central. Si alumnonan no ta beneficia ni docentenan tampoco, e ora pakico kier lanta un fundacion. E Minister ta bisa pa saca politica di enseñansa publico pero e no ta duna motibo of prueba cu cualkier un Minister den e ultimo 30 añanan a mete directamente den enseñansa. Riba dje, e ta saca DPS di politica dor di nombra un miembro/sostenedo di su mesun partido como director interino sin pasa un procedura transparente y publico.
Pero ta interesante pa sigui e posicion di e dos sindicatonan. Den esaki tin Magaly Brito di SEPPA cu a mustra nan disgusto pa e forma y e motibonan cu Minister kier pretende di uza pa pusha su idea. Tambe SEPPA a bisa publicamente cu Minister ko ta corecto den su pensamento riba si docente ta Ambtenaar of no.
Sinembargo, SIMAR a mustra un posicion mucho mas neutral y di aceptacion pa scucha e ideanan y pa laga miembronan mes dicidi. Pero su miembronan ta sintiendo cu e sindicato ta manera para na banda di Gobierno den esaki. Un cambio drastico, pasobra tempo di e problemanan na EPI, e mesun SIMAR a hiba Gobierno dilanti Corte pa logra un suma di 1 miyon florin pa 9 docente / Unit Managers. El a perde e tempo ey! Awor cu ta pa posicion huridico di 1200 docente, ta hala un banda pa Minister purba convence e docentenan.
Si mira e reaccionnan awe riba red social di docentenan, anto ta mustra cu SIMAR lo bay haye den confrontacion cu su mesun miembrecia. Algun siman pasa SPA a bay para bandi Gobierno y miembronan a bira baha e directiva. E tipo di situacionnan asina por spera, segun miembronan awe, cu lo sigui den SIMAR tambe si nan no para pa interes di TUR nan miembronan y no semper para pa un grupito of esunnan mas yega na e directiva.
