Dia 9 di december 2021 nos a dal un otro paso unda Aruba ta etalando su mes den region Caribense como e prome pais cu pa 2024 lo ta operando a base di energia limpi na caminda pa cumpli cu e tratado di Paris pa 2050.
VISION DI MINISTER DI ENERGIA Y GABINETE WEVER CROES 2:
E maneho riba tereno di energia ta enfoca riba durabilidad, sostenibilidad, accesibilidad y calidad.
Energia pagabel, sostenibel, duradero y limpi pa compania- y hogarnan na Aruba.
Reduccion di emision di CO² cu 45% na aña 2030 pa un medio ambiente sostenibel pa cumpli cu e meta di Nacionnan Uni pa combati e efectonan di calentamiento global cu 1.5° C.
Logra cumpli cu e tratado di Paris pa aña 2050 unda Aruba tambe ta contribui na un medio ambiente sostenibel “carbon neutral”.
Cu e mehoracion di eficiencia den nos companianan di utilidad cu proyecto manera RECIP4/SWRO3, lo logra reduci uzo di combustibel (HFO) pa produccion di electricidad di 3.679 Bbl/dia, na mas o menos 2.800 Bbl/dia. Y despues di logra un transicion di mas o menos 50% pa energia renobabel, reduci e uzo di combustibel ainda mas te cu menos di 2.000Bbl/dia pa 2030.
Aumento di energia solar y di biento di 20% na 2020 pa 35% pa 2024 cu un minimo di 50% pa 2030.
Aumento uzo di verhiculonan electrico pa 15% na 2030.
Aumento eficiencia di energia den residencianan y companianan cu 15% na 2030.
Reduci nos dependencia y consumo di petroleo crudo den un transicion pa energia alternativa solar y di biento rumbo introduccion di energia hydrogen.
E maneho nacional riba tereno energetico tin como meta diversifica e fuentenan di energia.
Introduccion di gas lo trece hopi beneficio pa nos pais: pa produccion di energia, pa refineria, riba tereno industrial y eventualmente hasta transporte automobilistico y casnan na Aruba.
E proyecto di un instalacion di gas LNG , lo haci cu Aruba por bira e hub pa almacena dicho producto den Caribe.
REFINERIA OF OTRO INVERSION
Pa loke ta trata refineria, Gobierno y RDA a a sinta cu diferente inversionista y operador pa e refineria. Lo continua cu esfuerso den e cuadro aki. Pa loke ta e tereno y terminal portuario di refineria, ta intencion di Gobierno pa den cuadro di estimulo di economia pa y na San Nicolas, reactiva y opera e puerto y terminal aki comercial- y industrialmente.
Pa logra implementacion di e maneho nacional di energia, ta primordial realisa e siguiente puntonan:
• Actualisa y modernisa e ley y regulacion di energia y awa potable.
• Restructuracion di e structura actual di tarifanan como catalysador di e transicion energetico.
