Un poco promer cu 3:30 di marduga ta pidi precencia di Polis pa bay cu urgencia direccion Piedra Plat pa un accidente cu herido.
Na e sitio, net un poco mas pabou di Jontai Home Center, ta bin encontra dos auto cu a dal den otro y cu basta daño material. Segun declarion na sitio, e chauffeur di e Nissan March tabata bayendo pabou ora diripiente un auto Hyundai Accent bayendo direccion pariba a dicidi di lora net su dilanti. Intencion tabata pa bay para na Chen Kee Pethouse. Pa evita un choke cu e vehiculo ey, e chauffeur a opta pa hala na su man robes.
Locual e no a tuma nota, ta di e siguinte vehiculo na caminda cu desafortunadamente e la bay dal aden. Ta trata di un Skyline cu tambe tabata bayendo pariba. Ambos auto a haya basta daño, Debi cu e chauffeur femenino di e Nissan March tabata keha di dolor na su pecho, a pidi asistencoa di ambulance na sitio pa bin atende cu ne.
Mientrastanto e chauffeur di e auto Hyundai Accent cu a causa e accident, a dicidi di aleha su mes for di e sitio. Sinembargo a logra capta e number di auto di cual nan a entrega na e Polis na e sitio.
Ambulance a bay cu e dama hospital pero un rato despues e chauffeur di e Skyline tambe a cuminsa sinta su nek y aki un otro ambulance a bin na e sitio pa atende cu ne. A opta pa transport’e tambe pa hospital pa un chekeo medico.
