Diadomingo anochi a bati alarma na Aeropuerto na momento cu a prohibi un hende muhe burachi pa aborda avion. Tabata trata di un vuelo di TUI pa Hulanda. Pa motibo di esaki, e pasahero a dicidi cu den slurf e ta cay sinta riba su tas y bisa nan cu e tin un bom den e tas.
Mesora a notifica Polis y a mobilisa siguridad di Aeropuerto, mirando e seriedad di e caso di loke e pasahero a caba di bisa.
Mesora a evacua tur hende for di e terminal pa asina e ekipo special di Polis, por a haci nan trabou di busca bom y verifica cu no tin ningun explosivo den e avion. E medidanan di siguridad den casonan asina ta universal, pues ta mesun cos tur parti di mundo.
Ken e pasahero ta, si ta local of ta stranhero, no ta conoci ainda pa nos. Pero si por confirma cu e pasahero tabata bao di influencia di alcohol. A activa crisiskamer di Aeropuerto mesora y tambe hefenan di Polis a presenta rapidamente na e sitio pa mira con ta bay atende cu e persona cu a notifica cu e tin un bom den su tas y ta insisti cu e mester subi avion, bao di influencia di alcohol, pa sigui pa Hulanda.
Un situacion hopi serio na Aeropuerto diadomingo anochi y cu tabatin autoridad y siguridad den movecion.