Hopi promesa y poco cumplimento. Esey ta e unico conclusion cu tin riba e forma con Aruba Airport Authority ta trata taxistanan. Shelo y tera a priminti e taxistanan algun aña pasa. Awe nan no tin ni e decencia di drecha e baño pa e taxistanan.
A priminti cu lo pone un luga pa bende cuminda y algo di bebe. Esey tampoco a logra te cu awe. Ora taxistanan cumpra algo den banda cerca hendenan di confiansa, ta manda batayon di security riba nan. Te hasta Polis ta cay aden. Practicamente 450 taxista ta paga un suma di 127 florin pa aña pa uza e zona paden na aeropuerto pa recohe turista cu yega. Berdad a traha un area unda nan por baha y uza baño, laba man y seca cu papel.
Pa algun tempo caba e baño no ta den funcion. WC no ta traha, no tin papel, labamano ta vies, filter di awa ta oraño, tur sushi, etc. No ta forma di trata e taxistanan. Ni maske a manda varios notificacion pa gerencia di Aeropuerto, toch nan ta keda haya mas y mas maltrato.
Taxistanan hasta ta pensando cu si cos sigui asina, pronto nan lo blokia tur entrada y demostra nan malcontento pa motibo di e maltrato aki. Nan ta boga pa Aruba Airport Authority trata esunnan cu ta duna servicio manera mester ta. No ta pidi extra pero tene cuenta cu taxista tambe ta hende y ta contribui anualmente cu nan fee.
