Mi a nace na Aruba, conoce nos cultura y asina mes tur biaha atrobe mi ta keda babuca. E custumber di partido cu ta pensa cu nan por paralisa henter trafico durante oras.
Grupito di fanatico di partido ta para banda of riba caminda pa regala banderin, pamfleta, petji y T-shirt na automobilista. De bes en cuando ta pega auto cu ta para keto yen di sticker. Y mientras tanto tur cos y tur hende ta para keto. Aparentemente e partidonan mes no ta compronde cu nan ta crea e impresion cu nan no tin nada miho pa ofrece. Ta bon mes cu tambe tin un biento fresco. Pa di prome biaha varios partido no tin solamente e palabranan di bon gobernacion den nan boca, pero tambe den nan programa. Aki aya hasta ta indica ki paso pa tuma concretamente pa caba cu mal gobernacion. Ta mas cu tempo. Awor cu a realisa cu ‘negoshi manera semper’ no por sigui mas, a bin conclui cu mester aplica henter un otro sistema di goberna. Mirando e magnitud di e problematica cu a crea durante decada y cu mester soluciona den un tempo mas cortico posibel, ta necesario pa mas partido politico posibel, gremio sindical y empresarial y agrupacion comunitario traha hunto. E polarisacion cu a caracterisa nos mundo politico pa decada, mester habri luga pa un cooperacion estrecho. Esaki mester ta enfoca na coregi of elimina e gran cantidad di fayo cu ta obstaculisa un desaroyo sano di nos pais.
Esey ta nifica un transformacion grandi den pensamento y mentalidad. No solamente di politico, sino tambe di ciudadano y di organisacion. Sinembargo, pa hopi hende no ta cla cualnan asina ta e consecuencianan di malgobernacion y kico ta gana cu bon gobernacion. Pesey tambe tanto pa ciudadano como pa politico, y tambe pa representante di sindicato, dunador di trabou y dirigente di agrupacion comunitario ta importante pa participa aki dos siman na e Simposio tocante Bon Gobernacion. Pasobra lo clarifica ta cuanto mal gobernacion ta costa nos comunidad mas o menos y kico nos tur lo gana si lo goberna Aruba a base di e criterianan di bon gobernacion. Lo duna un imagen di e sistematica bou di cual mal gobernacion ta tuma luga. Esey ta haci corupcion practicamente inevitabel. Di mes lo ofrece alternativa y abilidad pa realisa bon gobernacion.
Hende muhe por hunga un papel special den esaki. Pero tambe ciudadano y organisacion. Den esaki e compas moral di tur hende ta importante. Mescos cu e necesidad y e efecto di cooperacion cu movimiento civil den otro parti di mundo. Tur esaki y mas ainda lo keda trata y lo duna e participantenan e informacion necesario. Pa Aruba e simposio* lo ta un fuente di informacion importante pa realisacion di bon gobernacion. Ta di spera cu un parti creciente di nos comunidad realisa su mes e importancia di esaki y lo yuda ranca e garoshi di bon gobenacion.
* Simposio Bon Gobernacion, dia 12, 13 y 14 di september di 7.00 – pa 9.00 ‘or den Ballroom di Hotel Hilton. Por cumpra ticket di Afl. 100,- (cu ta conta pa henter e simposio) na Universidad di Aruba (edificio Apex banda di Crown, Blvd) y Plaza Bookshop.
