Resientemente e departamento di bishita den SDKK a organisá un konferensia interno ku e tema: “Teamwork – Keho i Preokupashonnan”. E konferensia aki tabata pa tur personal ku ta traha den e departamento aki i alabes pa e hefenan di otro departamentonan tambe den SDKK. Ofisialmente e konferensia aki lo a dura mitar dia, pero dor di e tantísimo preguntanan ku a bini dilanti di e personal, a disidí di hasi e konferensia un dia kompleto.
A base di e diferente kehonan i preokupashonnan ku ta bini di parti di e klientenan detené den SDKK, e hefe di e departamento aki, sr. Richene Pinedo, i su tim a disidí di organisá e dia aki. Asina aki tur disiplina interno ku i\tin algu di aber ku bishita pa ku e klientenan por sa mas di loke ta biba serka e klientenan pa asina SDKK drecha su servisio pa ku e klientenan den kuadro di su proseso di resosialisashon.
Durante di e dia di konferensia aki hefenan di entre otro e siguiente departamentonan a hiba palabra: hefe di unidat di seguridat, lider di tim na porta prinsipal, hefe di atministrashon di e detenidonan, ouditorio, hefe di unidat di korekshon, trahadó sosial, representante di kordinadónan, lider di tim di departamento di enseñansa, formashon i treinen, departamento di kehonan, supervishon i kòntròl, departamento médiko, representante di e hefenan di e diferente departamentonan i e hefe di e unidat di detenshon di e régimen spesial.
E temanan ku a wòrdu diskutí i ampliá riba dje tabata entre otro: e importansia di bishita pa e kliente detené, funshonamentu di e departamento di bishita en general i en espesial, tumamentu di artíkulo i kambio di ora di bishita i e maneho pa tuma desishonnan den wikènt, bishita di fiskal i e veredikto di Korte por eskrito pa ku e kastigu di e kliente, bishitanan ku ta wòrdu regla eksplísitamente dor di e departamento di trahadónan sosial, maneho na e porta prinsipal, un tòp 10 di e kehonan ku ta drenta ku frekuensia di parti di e klientenan detené, tumamentu di i dunamentu di remedi na klientenan, tambe a papia tokante di rapòrtnan i desishon pa ku kastigunan doméstiko pa ku klientenan na momentu ku nan faya ku e reglanan den SDKK. Finalmente a para ketu na un parti hopi importante ku ta e parti di seguridat i e kosnan ku ta wòrdu konstatá den nos kamber di kontrol.
En general por bisa ku e dia tabata un eksitoso. E petishon pa drecha e servisio di e departamento aki a bini di diferente motibu, na promé lugá e klientenan ku ta detené mes, e famianan di e klientenan, trahadónan di e departamento konserní i di Tim di Maneho di SDKK.
Un kos tur partisipante na e dia aki tabata di akuerdo ku otro tabata: SDKK mester sigui fortifiká e lasonan familiar entre e klientenan i nan famianan i nos por hisa e kalidat di servisio aki riba un nivel un tiki mas haltu. Dor di skucha e deseonan di e klientenan i trata konforme e simpel prinsipio di SMART (Spesífiko, Midi, Akseptabel, Realístiko, Tempu) pa trata na ehekutá e petishonnan ki pa asina e desaroyo di e kliente por kana mas efisiente i salú. Importante ta ku pa por logra laga un kliente komprondé e importansia di kambio di su aktitut i manera di pensa pa unu kaminda e por ta un bon siudadano, mama, tata, yu ets, e kliente mester wòrdu stimulá i enkurashá pa nan demostrá esaki. I ta importante ku na momentu ku e kliente ta detené e keda ku su ròl di mayor i/òf edukadó durante di nan periodo di detenshon.
Di e forma aki SDKK a duna oido pa den kuadro di e trayekto di resosialisashon i reintegrashon, pa mustra e esfuersonan ku e personal di e departamentonan konserní, konhunto ku e Tim di Maneho, ta hasi a base di investigashon i análisis pa atendé ku e diferente nesesidatnan bou di e klientenan den SDKK. Traha komo Tim: bini huntu ta e komienso. Keda huntu ta progreso. Traha huntu ta éksito.
