E pensamento di Minister Rudy Lampe ta pa tur hende bay over den e fundacion nobo cu lo reemplasa DPS, tanto e docentenan como tambe esunnan cu no ta docente.
Mas ainda di acuerdo cu e Minister e trahadonan aki bao di DPS no ta ‘ambtenaar’. SEPPA tin otro opinion cu e Minister riba e asunto aki! Pa loke ta e posicion huridico, SEPPA a mustra Minister cu tin trahadonan bao di DPS cu tin nan Landsbesluit, pues ta nombra como Ambtenaar (empleado publico), pues automaticamente LMA ta conta pa nan. Manera ya indica hopi di esnan cu tin un Landsbesluit tambe tabata cay bao di un of otro departamento di Gobierno prome cu a pasa bao di DPS.
Kiermeen bisando cu e nombracion di “niet-onderwijzend personeel” via LB como fout no ta correcto. Esaki no ta cuadra, mirando cu DPO tabata traha LB pa niet-onderwijzend personeel y directie onderwijs, MB pa onderwijzend personeel hasta prome cu 2009 ora DPS a independisa di Directie Onderwijs.
Kiermeen semper a nombra e trahadonan aki via MB como ambtenaar y LMA semper a wordo aplica pa cu nan. Semper e trahadonan a wordo trata como ambtenaar, y tur reglanan vigente pa e ambtenaar ta wordo aplica riba nan relacion di trabao.
Tambe ta incorecto e cuenta ey di cada rato menciona “onderwijsambtenaar”by ta zona mescos cu tin distincion entre ambtenaar. Esaki ta leu di ta e berdad, Ambtenaar ta keda Ambtenaar !!
Pa SEPPA e trahadonan cu ta cay bao di DPS mester haya e derecho pa prome dicidi si nan kier bay over den e Stichting si of no. Y no manera ta purba di hasi, esta automaticamente tur hende mester bai over. Pa esaki Minister mester negocia hunto cu sindicato un Sociaal Plan, unda ta regla e derecho di tur hende cu si ta desea di bay over den e Stichting pero tambe pa esnan cu no ta desea di bai over. Mescos ta importante con e Statuut mes di e Stichting nobo aki ta hinca den otro !
Ta conoci e kehonan di semper, di falta di material pa por funciona manera mester ta, pa e inseguridad na pia di trabao, pa klasnan cu cantidad grandi di mucha, pa falta di decisionnan concreto y efectivo, etc.. Pero tambe pa e hecho cu e muchanan di awendia no ta mescos cu antes, y hasta tin cu confronta otro tipo di situacionnan cu muchanan cu ta amerita atencion di otro tipo di profesionalnan. Ta parce cu no ta suficiente cu e docentenan y esnan cu no ta docente ta labora den un ambiente no mucho agradabel pa awor nan ta haya nan mes obliga di bay den un otro forma di trabao. E trahado ey nunca lo por ta motiva!
Minister Rudy Lampe tambe kier introduci un tipo di plataforma di participacion yama “Medezeggenschap di docentenan y mayornan”. E sistema aki ta uno di hopi tempo, conoci na e.o. pais Hulanda pero tambe na Merca. Semper participacion di esnan envolvi ta importante y ta aplaudi. Den e caso aki e ta zona bunita sinembargo e por bay un direccion no desea tambe. Ta pesey mes, e reglanan di wega mester ta bon conoci pa asina tur hende sa tambe con pa protega su mes.
Si antes e trahado tabata cay bao proteccion di e LMA y den caso di retiro etc. e por defende su mes dilanti un Hues, e situacion por cambia tambe den futuro unda presion di gruponan ta defini su futuro y stabilidad. No ta pornada e ambtenaar ta protegi cu un status special. E dunado di trabou ta na mesun momento gobierno di pais. Mester evita den un democracia no madura y comunidad chikito e wordo persigui cq. poni den desventaha. Esaki ta e actitud cu ta wordo spera tambe di e Minister actual di Enseñanza.
Na final, ta importante cu e Minister ta admiti si cu e prome encuentro cu tabatin cu SEPPA y SIMAR lo ta e comienso y cu nos lo sinta na mesa pa sigi atende e preocupacionnan cu tin bao di trahadornan cu ta cay bao di DPS, sigur riba e asunto aki di Independizacion di DPS.
