Fundacion Lotto pa Deporte a ricibi bishita di referee di MMA Andres Tromp, kende lo ta biahando dia 5 di Maart pa Merca. E lo ta fungiendo como referee hunto cu refereenan renombra di Merca durante e evento di Caged Agression cual ta un evento di 2 dia.
Durante e encuentro aki Andres Tromp a splica director di Fundacion Lotto pa Deporte, Di-Stefano Wernet, mas over di e deporte MMA y kico tur e lo ta haciendo na Davenport Iowa durante su bishita. Andres Tromp ta miembro di Association of Boxing Commissions & Combative Sports y ta representante di ABC. Na diferente ocasion el a fungi como referee pa nan y ta contento di a ricibi e invitacion aki un biaha mas.
Fundacion Lotto pa Deporte ta contento di a mira e oportunidad cu Andres Tromp a ricibi y despues di a scucha kico tur e ta bay haci na Merca, nan ta sosteniendo e referee pa asina e sigui representa Aruba den exterior. Durante e bishita di Andres Tromp na Merca, e lo ta reuniendo cu e directiva di Iowa di ABC y hopi otro reunion pa asina mira kico tin den futuro pa refereenan di Aruba keda certifica y reconoci. El a gradici Fundacion Lotto pa Deporte p’e sosten y confiansa duna na su persona pa representa Aruba na Merca como referee.
