Frakshon di MAN a tuma nota di konsternashon ku a surgi den komunidat tokante e maneho adaptá pa ku studiamentu den region ku minister Sra. Alcala Walle a anunsiá.
Den e maneho nobo ta indiká ku lo bai duna beka den region solamente pa estudionan na nivel di bachelor i master i no pa highschool.
Frakshon di MAN ta di opinion ku nos tin hopi hóbennan ku talento deportivo i ku ta ekselá den nan prestashon eskolar tambe. Lo ta un lástima ku e hóbennan aki ta keda deprivá di e oportunidat pa bai studia na, por ehèmpel Merka, Cuba i Repúblika Dominikana i pèrdè oportunidat pa haña “scholarship” pa desaroyá e talento deportivo aki kaminda ta dor di nan talento deportivo portanan a habri pa nan tin akseso na e institutonan aki.
Frakshon di MAN ta di akuerdo enprinsipio ku un maneho kaminda ku si e estudio por keda siguí na Kòrsou mes, ku no por haña beka pa studia pafó di Kòrsou.
Un di e motibunan prinsipal ta pa sostené nos institutonan lokal i promové nos propio institutonan na promé lugá. Frakshon di MAN inkluso ta di opinion ku mester promové nos propio institutonan den eksterior pa mas studiante hasi uso di, por ehèmpel, nos universidat pa sigui nan estudio manera ta e kaso aktualmente.
Frakshon di MAN ke duna su aporte i ta konfia ku pronto huntu ku Minister di Enseñansa señora Alcalá Wallé, por yega na un maneho ku no ta perhudiká nos muchanan pero ku alabes no ta okashoná ku mester sakrifiká otro aspektonan di enseñansa.
