Durante e mainta di diasabra, habitantenan di e municipio di Pacaraima, ciudad Brasileño na e frontera cu Venezuela, a cuminsa un manifestacion contra migrantenan Venezolano, pa supuesto vinculo cu actonan delictivo den e region, segun Folhabv.
Un di e organisacionnan di e manifestacion, Vanderbegue Ribeiro, a splica cu e motibo di e protesta a tuma luga despues cu un comerciante di Pacaraima a wordo interna den e Hospital General di Roraima (HGR) e anochi di diabierna 17, despues di a wordo golpia pa cuater persona cu lo tabata di nacionalidad Venezolano, pero no tin confirmacion ainda di autoridadnan policial.
“Nos lo bay keda henter dia, ya cu e anochi ey mes, un habitante di Pacaraima a bira victima di vandalismo di algun migrante cu ta pasa e frontera pa comete crimen. Nan a somete henter e famia y a golpia nan. E tabata un otro victima y nos tin mester pa autoridad tuma medida,” e bisiña di e frontera a pidi.
E manifestantenan a kima y a distrui tent di e migrantenan cu ta keda den refugionan improvisa den e cayanan di Pacaraima.
Aparentemente e atake a origina despues cu un bisiña a wordo “asalta” pa Venezolanonan, segun e cuerpo humanitario di ehercito, desplega na e luga, atrabes di un comunicado cita pa e portal local G1.
“E hecho aki a genera un descontento di algun bisiña di Pacaraima y durante e mainta di diasabra, a tuma luga un manifestacion cu actonan di violencia y di destruccion di campamento di migrantenan estableci den algun luga publico,” e dependencia a bisa. Te na e momento no tabata tin un reporte oficial di herido, pero imagennan difundi na television, ta mustra partinan di un campamento kima.
