Arubaanse Zwembond, AZB, cu hopi honor ta anuncia cu 2 persona hopi activo den mundo di e deportenan acuatico na Aruba a ser eligi como miembro di 2 comite di FINA, e organo mas halto pa desaroyo, promocion y control di e Deportenan Acuatico. Pa AZB esaki ta un desaroyo hopi positivo, tumando en cuenta cu tin 207 pais miembro di FINA, y pa 2 di nos personanan ta wordo selecta ta indica cu nan trabou a wordo reconoci.
Esther Croes, a ser elegi pa sirbi den e comishon technico di landamento sincronisa. Esther, como hoben tabata un atleta di synchro, y a representa Antiyas Hulandes na Weganan Olimpico di 1984 na Los Angeles, California, USA. Despues di a finaliza su studio na Belgica,Esther a regresa Aruba y a continua di ta involvi cu Synchro na Aruba. Esther ta un Hues FINA pa mas cu 25 aña caba, y recientemente Esther a wordo invita pa bai China pa sirbi como Hues invitado na e Weganan Nacional di China. Esther actualmente ta Secretaria General di Arubaanse Zwembond, y ta miembro tambe di Comishon Tecnico di Synchro di UANA, cu ta e organo cu ta encarga cu e deportenan acuatico den e continente Americano. Como miembro di UANA, Esther ta envolvi cu e organisacion di e competencianan den dicho continente. Diadomingo awor Esther lo biaha pa Chile, pa e Campeonato Panamericano di Synchro.
Como miembro di Comision Tecnico di FINA, Esther lo ta involvi cu tur decisionnan pa e disciplina, tur cambionan cu lo por bin, como tambe participacion na tur e competencianan Synchro cu FINA ta organisa.
Maureen Croes pa e próximo 4 anja lo sirbi como miembro di e Media comité. Maureen tambe a cuminsa den e deporte di landamento como un atleta, representando Aruba na varios competencia den region. Despues di culmina su estudio y estadia pa algun aña den exterior, Maureen a regresa Aruba y a fungi hopi aña como coach di e equipo di landamento competitivo Stingray Swimming Aruba. Na mes momento, Maureen tabata e Meet Director pa tur competencia local. Pa a competencianan internacional cu Aruba a host den pasado, manera Carifta, CISC y weganan di Reino, Maureen tabata encarga cu e parti di competencia di landamento. Pa e ultimo anjanan, Maureen ta fungi como consejero tecnico di Arubaanse ZwemBond,como tambe Secretaria General di CCCAN, e organo encarga cu e deportenan Acuatico den Caribe y America Central,y tambe Secretaria di e Comishon Technico di Masters di UANA. Luna pasa Maureen tabata na Budapest Hungria, pa 2 siman durante e Campeonato Mundial di FINA manejando e oficina di UANA.
