Dialuna atardi a tuma luga un conferencia di prensa di gobierno, caminda cu Prome Minister, mr. Evelyn Wever-Croes a elabora riba e nombracion di e proximo miniser plenipotenciario di Aruba na Washinton, Merca. Manera ya ta conoci, partido RAIZ a propone Zulema Dabian-Erasmus como e proximo persona pa asumi e funcion diplomatico aki. Durante e conferencia di prensa di gobierno, Wever-Croes a confirma cu tur cos a keda cla pa cu e nombracion y ta prepara pa Dabian sali direccion pa Merca.
E proceso di screening a bay sublime cu resultado positivo pa Dabian. Awo, ta pendiente cu e proceso final p’asina Zulema ricibi su paspoort diplomatico y su VISA di Merca. Ta planeando un bishita di trabou e siguiente simannan nos dilanti caminda e Minister Plenipotenciario saliente, Joslin Croes lo traspasa su trabou y introducie na e personal y edificio caminda lo ta traha. E GevMin di Aruba na Merca lo traha den e Embahada di Hulanda na Washington. Compara cu e GevMin na Hulanda, no tin un ekipo di Arubiano dedica pa e trabounan e minister. Pero e GevMin tin acceso na tur informacion y acceso di e embahada. Tin unicamente un persona dedica pa yuda e GevMin den su trabounan diario den e embahada. Zulema ta cla pa traha y hiba su pais padilanti, awo, cu un otro pechi.
Wever-Croes a comenta cu tin diferente trabou cu Joslin Croes a laga atras, algun cla y otro pa sigui traha riba dje. E renegosacion cu gobierno Mericano pa cu CPB ta un di e puntonan importante. Pero tambe pa sigui posiciona Aruba como un partner clave pa Merca. Merca ta keda e sector mas importante pa nos turismo.
Zulema ta traha pa Gobierno di Aruba desde 2005. Actualmente e ta eherce e funcion di Afdelingshoofd na Departamento di Asuntonan Economico, Comercio y Industria di cual e tin un team encarga cu Business Support, Export Promotion, Investment Promotion y Trade Policy. E tin e funcion tambe di Director Interino di e Departamento. Zulema a gradua na Rijksuniversiteit Groningen den International Relations/International Organizations despues di a caba VWO na Colegio Arubano. Un stage na Ministerio di Asuntonan Exterior cerca e Adviseur Koninkrijkszaken a duna Zulema e conviccion cu e miho manera pa aporta na bienestar y progreso di su dushi isla, ta pa traha na Aruba mes.
Semper e tabata di opinion cu aunke Relacionnan Exterior ta un tema di Reino, cu Aruba por ta un pionero riba nivel internacional y por influencia e agenda internacional. Zulema ta mira cu Aruba tin hopi candidatonan cu por funciona exitosamente den diplomacia den Reino Hulandes, pero e oportunidadnan ta limita pasobra mester competi cu Hulandesnan pa un funcion diplomatico na Ministerio di Asuntonan Exterior.
Den su carera como ambtenaar, Zulema a eherce e funcion di beleidsmedewerker na Departamento di Asuntonan Economico, Comercio y Industria, como na Departamento di Asuntonan Exterior. Su experticio den gobierno a amplia ora Zulema a traha na Bestuurskantoor prome como Adviseur di Minister y despues como Waarnemend Secretaris di Conseho di Minister, na unda el a experencia di cerca e proceso di decision politico.
Banda di su trabou, Zulema a contribui na empoderacion di hobennan door di ta docente part-time di Organization, Governance and Management na Universidad di Aruba. Desde 2021 Zulema ta Segunda Secretaria-General den e directiva di Comite Olimpico Arubano. Recientemente el a forma parti di e Comision Bishita Real instala door di Minister-President riba solicitud di Gobernador di Aruba. Zulema ta casa desde 2004 cu Melvin Dabian y ta mama di un yiu muhe (20) studiando na Hulanda y un yiu homber (16) cu tin ambicion pa bira un Student-Athlete den Atletismo.
