Diamars atardi e dos rumannan Klabér a biaha pa Europa pa asina sigui cu nan plan di 2019/2020. Na Europa ex campeon mundial coach Olimpico Henk Meijer lo sigui cu e rumannan Klabér pa asina nan participa den e Luxembourg Open y Austria Open cu ta e dos weekendnan nos dilanti. Durante e siman nan lo train na e scol di Henk Meijer.
Cornel Djaoen di nos planta nacional a compaña e dos rumannan pa asina documenta tur nan training y competencianan. Cornel Djaoen tin varios aña caba ta sigui e atletanan di Aruba rond mundo, algo cu hopi dirigente di deporte ta aprecia masha hopi mes y nos di Brazil Taekwondo Stichting ta gradici Cornel Djaoen pa esaki.
Brazil Taekwondo Stichting ta gradici e apoyo cu Mario Maduro di Massage Therapy Aruba situa na Calbas, Noord ta duna e rumannan Klabér. Aruba Taekwondo Bond ta apoya e atletanan grandemente, mirando cu e plan di 2019/2020 ta pa sigui prepara e atletanan pa futuro, bringando den cada continente, ganando mas y mas experencia cu e meta pa logra cualifica na Maart 2020.
Nos ta desea e rumannan Klabér exito na Luxembourg y Austria. Presente na Aeropuerto tabata tin nan rumannan, famia y conocinan pa wak e rumannan Klabér biaha bay pa alcansa nan metanan.
