Diadomingo anochi a sosode un pelea di grupo cu basta destruccion den Azia Restaurant, den area di hotelnan ‘high rise’. Den e pelea un trahado di e localidad a resulta herida cu corta na man. Ambulance a presenta pa asina paramediconan atende cu e empleado herida, mientras cu paden tabatin basta destruccion. Ta varios unidad di polis a bay pura den e direccion ey, pero no a topa cu e bringadonan.
Ora a yega a tende cu un grupo di cinco persona a core sali. Basa riba discripcion duna na polis, a cuminsa busca nan. Tur ta ciudadanonan local, segun e informacion cu polis a ricibi. Un di e partidonan ta Nigel Williams, yiu di e lider politico Michael Williams di partido Pueblo Prome, mientras cu e otro ta Kevin Wever, yiu homber di minister-president Evelyn Wever-Croes, lider di MEP. Ambos homber ta mayor di edad y ta responsabel pa nan actonan.
Informacion for di e sitio ta bisa cu Williams a huur e seccion VIP den e restaurant pa un evento priva cu nan grupo. Pa casualidad e yiu homber di minister-president tabata sinta net pafo di e area ey cu su pareha ta come. Parce cu durante sali-drenta di esunnan den VIP Room lo tabatin intercambio di palabra cu a conduci na agresion.
Pero, den e proceso, na momento cu e yiu homber di Williams a bay tira cu un boter den e restaurant, a herida e chef di e restaurant na su brasa. E tabata sangra bastante debi na corta di e boter. Ambulance a presenta na e sitio pa por a para e sangramento y pa brinda cuido avansa na e empleado, cu a resulta herida pa motibo di pelea entre clientenan.
Di otro banda, fuentenan ta bisa cu lo tin un recibo di como tres mil florin na daño causa na mueblenan y otro pertenencianan den e restaurant cu a kibra pa motibo di e pelea al estilo “wild wild west” den e restaurant, dilanti tur turista comiendo trankil riba un pleno diadomingo anochi. Separa di e daño haci na e propiedad, tin un recibo di como 3500 florin habri di tur e mesanan cu huespednan cu a lanta sali na careda bay sin paga, pasobra memey di tiramento di boter cu stoel y mesa, nan a opta pa scapa nan bida. E cuentanan ey tambe awor ta riba nomber di e “bringadonan”.
Te cu anochi laat no tabatin ningun detencion ainda, aunke cu e imagennan di e camara di siguridad ta testigo di e fandanga cu tabatin den e restaurant turistico.
Ta conoci si cu e dos lidernan politico ta contricantenan di otro awendia. Den pasado nan tabata campaña hunto, pero awor nan a bira enemigo di otro. E mesun odio aki ta inculca tambe den e yiunan cu a dicidi di bay regla cuenta den Azia Restaurant. Awe por spera cu lo haci denuncia y lo bay tende mas di henter e asunto aki.
Probablemente mirando e caso y esunnan envolvi, lo por spera detencion. No ta conoci si Azia mes lo haci denuncia pa e destruccion den nan localidad y daño financiero na recibonan cu a keda sin paga. Diadomingo anochi e unidadnan policial a busca tur eybanda pa e grupo di cuater of cinco bringado cu a core bay, pero no a topa cu nan.
