Fruteria Virgilio ta un di e hopi fruterianan cu a wordo afecta door di e situacion cu Venezuela. Eynan tambe nan tabata tin bakinan bashi. Eynan hopi biaha ta productonan di Venezuela ta esnan cu ta yena e bakinan ey.

Antonio ta e propietario di e fruteria y a conta riba e situacion.

El a comenta cu al momento e ta duro pasobra ya ta bay casi 15 dia y nan ta depende basta di e cosnan di Venezuela. Por lo pronto tin cu warda wak ki alternativa tin. Awe nochi mes tin algun cos cu lo yega cu avion for di Colombia. Pero esey ta djis pa wanta e calamidad un poco. Mañan ta yega e containernan Mericano, unda cu tin fruta pa algun dia. Pero e stock stock normal, ainda no tey.

Prijs

E productonan Venezolano ta miho pasobra e prijs ta hopi mas competitivo. Hopi diferente. E ta por lo menos 30% mas barata. Tur dia tin clientenan ta bin puntra y clientenan nobo tambe, ta buscando. Bo ta mira tur sorto di hende ta buscando e productonan. Pero ainda nada.

 

Dependencia

Segun Antonio, ta haya algun cos exotico cu avion for di Colombia, esunnan cu ta bin via e companianan grandi na Aruba tambe. Pero di Venezuela, sigur sigur, riba 50%. Eynan e volumen grandi ta pa benta por mayor y detal tambe cu e pueblo.

 

El a yega di pasa

Dos aña pasa a experencia esaki, pero no asina fuerte. Pasobra e botonan grandi normal no por a sali, pero e chikitonan si por a sali yega. Pero awo si nan a cera full, ni grandi, ni chikito.

 

Contacto

Al momento e mesun hendenan cu ta exporta, ta puntra kico por a tende. Nan mes eynan no sa di nada. Door cu tabata tin un reunion, nan ta puntra kico sa di e reunion. Pero e fruteronan tambe ta en espera pa sa kico ta kico.

E mercancia sigur lo yega fresco, pasobra nan ta pidie dos dia prome. Despues nan ta carg’e pa yega Aruba. E ta yega fresco, pasobra nan no tin’e eynan corta. Nan ta pidie, prepare y mande Aruba.

 

E mercancia

Segun Antonio, si un fruta ta di Venezuela, e ta hopi economico. Pero si ta di Merca, ta un cambio di varios florin. Tin ora bo ta hay’e, depende e producto. Manera un patia, sigur sigur, un diferencia di 10 florin for di esun Mericano cu esun Venezolano. Tomati ta varia 3 pa 4 florin den prijs pa kilo. Nan tin tiki pasenshi. Lo keda warda wak si e ta bin di pazuid, wak kico ta bin.