Minister di Asuntonan Social y Husticia ta rumbo pa Hulanda. Cu esaki ta haci cu tres di e ochonan ministernan ta den exterior. Minister mr. Geoffrey Wever di RAIZ ta na Hulanda p’e evento di Aruba Investment Summit, Minister Glenbert Croes di MEP tambe ta den exterior y awo Minister Rocco Tjon tambe ta rumbo pa Hulanda.
E ministernan tin e funcionarionan di protocol di gobierno ocupa, mirando cu hasta riba diasabra tin cu bisti bachi pa ricibi nan na aeropuerto pa escoltanan via hanchinan apart den aeropuerto pa por subi avion.
Minister Tjon na su salida pa Hulanda a combersa cu representante di Headlines Group den e VIP Room na Aeropuerto. El a conta cu ta biahando pa Hulanda den cuadro di algun palabracion hunto cu Fundacion Famia Planea Aruba(FPA).
A scoge FPA como un di e miho fundacionnan den region y e metodo di trabou con ta opera lo sirbi como guia y muestra pa implementa den region completo.
Tjon lo reuni cu diferente minister na Hulanda, entre otro Minister di Enseñansa, Robbert Dijkgraaf y tambe e plataforma Rutgers. Ta mas bien pa concretisa algun palabracion cu ya a acorda virtualmente caba.
Tjon ta probecha cu e ta na Hulanda pa bishita algun centro di Brandweer y mira con por ricibi asistencia for di nan parti pa e Cuerpo di Bombero Aruba.
No obstante cu henter e biahe ta bay rondo di e Fundacion Famia Planea, Tjon a opta pa no biaha cu ningun representante ni e director di e fundacion sino e mes compaña cu un coordinador di su ministerio.
Tocante Rocco Tjon
Rocco Tjon ta Minister di Husticia y Asuntonan Social desde dia 20 di september 2021. Prome cu esey el a sirbi como parlamentario entre 2017 pa 2021.
El a studia na academia di polis na Hulanda, pa el a bira inspector di polis na Aruba. El a cuminsa su carera den polis na aña 2000 y a sali na 2016 ora cu a nombr’e como director di KIA.
Den su prome salida den eleccion na 2017 el a logra 1213 voto. Pero den e ultimo eleccion na juni 2021, no obstante un campaña pisa, el a cay den su votonan te na 908 voto individual, cu ta representa un caida di 25%. E ta e minister cu menos voto den Conseho di Minister di Gabinete Wever-Croes II, forma pa un coalicion MEP y Raiz.
