Aruba Airport Authority (AAA) ta na Colombia p’e evento turistico Routes Americas 2024. E biaha aki AAA a uni cu Aruba Tourism Authority (ATA) pa pone un booth y a haci esey den forma strategico.
Barbara Brown, Chief Revenue Development & Communications Officer na Aruba Airport Authority N.V., a splica cu e decision di bin cu e booth tabata uno strategico, pa nan bay ‘all out’ e aña aki. AAA ta atendiendo tur conferencia di Routes pa 28 aña. Tin e Routes Americas cu ta haci e region Latino America, Caribe y Noord America. Tambe tin e World Routes, unda ta topa e aerolineanan di Europa, Asia y henter mundo.
Te cu awo AAA a haci diesshete World Routes, mientras e biaha aki nan a haci e di diesun Routes America. Den pasado AAA tabata bay cu dos delegado y tabata haya reunion cu e aerolineanan. Cada bes nan mester a cana rond y bay diferente mesa, haya un luga pa sosega, topa otro pa discuti di e siguiente reunion, bay n’e siguiente reunion. E tabata duna basta stress pa haci algo asina sin un tent.
Pero como cu nan ta bayendo pa Routes pa hopi aña, unda cu tanto e aeropuerto y Aruba como destinacion ta bayendo asina bon, esey a pone cu nan a dicidi di bay cu un booth. E voordeel grandi ta cu bo por reuni cu e aerolineanan, por invita nan yega cerca nan. E miho parti e biaha aki ta cu ATA a join nan.
Brown a splica cu nan no tabata papia solamente riba e trabou di e aeropuerto, tambe cu su ‘performance’ cu e destinacion di Aruba. Esaki tabata un pakete completo p’e aerolineanan pa nan no tende solamente di loke e aeropuerto ta haci, kico e aeropuerto kier mira kico e desaroyo di negoshi ta bira. Pero tambe e destinacion por duna nan informacion tocante sosten mercadeo y tur otro esfuerso cu e destinacion por haci p’e ruta di aerolinea ta uno exitoso.
E laga cambia hopi, no solamente durante e añanan. El a indica cu na 1999 nan a cuminsa cu e Routes, pero esaki a cambia specialmente cu e situacion di Covid-19. E aerolinea kier hopi mas contacto directo cu aeropuerto como destinacion. Tambe nan ta interesa den kico por yuda nan crece e ruta, yenamento di avion pa nan. E no ta cuestion solamente bisa cu tin aeropuerto y por ofrece cierto facilidad. E aerolineanan kier pa aeropuerto tambe sostene nan operacion, sostene e ruta cu nan ta operando, probablemente yuda den marketing pa sostene local, marketing pa sostene nan mercado di unda nan ta bulando. Tambe e sosten di marketing cu nan mester di e destinacion mes. Esey ta un pregunta cu aeropuerto lo keda ricibi di e aerolineanan, unda ta yuda yena e avion.
