Ayera mainta pa mas o menos un 8:30am Wardacosta a ricibi un yamada di un piscado atento cu a mira un boto Venezolano piscando den awa teritorial di Aruba. Na mes momento un patruya di Wardacosta a sali pa bay identific’e. Pa mas o menos 9:25am e metalshark a intercepta un boto tipo yola cu tabata piscando 3 miya pazuid di cabes di Aruba.
E boto cu nomber “Mary Perez”, procedente di Venezuela tabatin 3 tripulante di nacionalidad Venezolano abordo y tabata piscando cu palambra. No mag pisca cu palambra, ley ta prohibi esaki!
Mesora a tuma contacto cu fiscal cu a duna ordo pa tuma e pisca y e palambra den beslag. E piscanan a bay pa Huize Maristella y a destrui e palambra. Despues di esaki e boto y tripulantenan por a bolbe nan pais.
Wardacosta ta gradici e usuario di laman atento cu a notifica esaki y ta encurasha tur otronan pa meld cualkier iregularidad riba lama.
