Diabierna ultimo a celebra e hecho cu e prome dies “kustwachters” a finalisa nan estudio di Basisopleiding Kustwacht (BOK) na Corsou. E grupo di hobennan aki ta procedente for di Aruba, Corsou y Sint Maarten y nan lo traha tambe riba e diferente islanan aki.
E grupo a inicia e estudio aki dia prome di januari 2020 cu intencion di finalis’e den un aña di tempo. Pero, como cu Covid-19 a haci un impacto riba e islanan y tur e consecuencianan cu e pandemia a bin cu ne, a pone cu e estudio di un aña a bira un aña y mey.
Durante nan estudio “BOK” a duna e aspirantenan varios materia di les, tanto teoretico como practico. Asina por menciona curso specialisa di siguridad riba lama, EHBO, habilidad con anda cu arma y con pa tira, tecnicanan pa aborda un embarcacion, conocimento di leynan maritino y entrenamento fisico. Ta bon pa accentua cu disciplina y integridad tabata materianan importante durante e estudio.
Banda di e tecnicanan maritimo, tambe e Kustwachternan a bay opleiding como polis extraordinario, conoci como e curso di buitengewoon agent van politie (BAVPOL). A sigui e curso aki na e scol pa polis di Corsou, esta e Opleidingsinstituut Rechtshandhaving en Veiligheid Curaçao (ORV).
E resultado ta un grupo nobo di personal pa Wardacosta, cu ta independiente y confiabel, cla y capaz pa enfrenta tur e retonan cu mantencion di ordo maritimo ta bin cu ne diariamente riba lama y na costa di nos islanan.
