Director suplente di Wardacosta di Reino Hulandes den Caribe, Eugène Middelhof MBA a bishita Minister Plenipotenciario, Guillfred Besaril. Durante su bishita Middelhof a informa minister Besaril riba e ultimo desaroyonan na Wardacosta, manera inversionnan den material, principalmente den ekipo di radar.
Tambe Middelhof a bisa cu Wardacosta a introduci mas oportunidad pa estudio pa e personal. Pa keda riba e tereno di personal Middelhof a señala cu Wardacosta ta haciendo mas uzo di “zij instromers”, cu ta personal no uniforma pa traha den e organisacion.
Por ultimo Middelhof a bisa cu Wardacosta ta den un reorganisacion actualmente pa stipula e operacion di Wardacosta pa e añanan siguiente.
Minister Plenipotenciario Guillfred Besaril a gradici Eugène Middelhof pa su update riba e ultimo desaroyonan pa cu Wardacosta di Reino Hulandes den Caribe cu tin un tarea hopi importante den pa cuida nos costanan.
Wardacosta di Caribe Hulandes (KWCARIB) ta e entidad cu ta maneha Wardacosta pa e parti Caribense di Reino Hulandes, esta pa Aruba, Corsou y Sint Maarten. Como e oficialnan di ley maritimo nan ta eherce tareanan riba tereno di deteccion, supervision, search & rescue (SAR) y prevencion di desaster.
Wardacosta di Reino Hulandes den Caribe ta un cooperacion entre e cuater paisnan cu hunto ta forma Reino Hulandes. E personal ta procedente un parti for di Marina Real, pero tambe tin un parti cu Wardacosta mes ta recluta y educa. E organisacion ta forma pa mas of menos 210 empleado local y 30 personal di Marina Real. E Commandant der Zeemacht in het Caribisch Gebied (CZMCARIB) ta e militar cu e rango di mas halto di Marina Hulandes presente den e region Caribense y alabes ta fungi como director di Wardacosta di Caribe Hulandes.
A funda Wardacosta na aña 1993, pero e tempo ey ainda sin base huridico. Dia 1 di februari 1996 a funda un Wardacosta independiente pa Antias y Aruba (NA&A CG). E nomber formal awendia ta “Kustwacht voor het Koninkrijk der Nederlanden in het Caribisch Gebied”. Desde e cambionan politico y status di e paisnan den Reino Hulandes despues di 10 di october 2010, no ta opera mas bou di e nomber original.
E organisacion ta posee di dos avion di e tipo Bombardier Dash 8, dos helicopter di e tipo Agusta Westland AW139, tres cutter di e tipo Damen Stan Patrol 4120 y un cantidad di boto mas chikito. Banda di e vehiculonan aki, tambe nan ta conta cu unidadnan di Marina Real manera un stationship (cu helicopter) cu tambe sa uza pa tareanan di Wardacosta.
