Awe marduga net prome cu 4:00am un homber a bati alarma pa un problema den Village na San Nicolas. Elange Dorceus a sali di su cas pa bay cumpra un sigaria. Pero e no a yega mucho leu pasobra den Caya St. Kitts un homber a saca un pistol di 9mm riba dje, cu casi a cost’e su bida.
El a conta cu pasando den Village, na dado momento un auto marca Toyota modelo Altezza color shinishi a drenta den direccion prohibi (verboden) y tabata biniendo den direccion di Dorceus. Ambos auto a para y no tabatin ningun movecion. Den un frega di wowo un homber bisti den jacket preto y carson bruin, color scur y cabey estilo “rasta”, a sali saca un arma riba dje y pone bandona e sitio mesora.
E victima a bay Polis pa informa di kico a caba di pasa cu ne. E ta masha contento cu den menos di 45 minuut ya Polis a logra detene e homber aki y trece Warda di Polis pa e duna cuenta di su acto. No ta conoci si Polis a topa cu e arma di candela. E victima ta sigura cu e tabata un pistol di 9mm y cu e conoce arma pasobra a traha den Polis na Haiti.
E homber tabatin masha elogio pa e forma tactico y lihe cu Polis a reacciona y kita un criminal mas for di riba caya. E no por kere cu djis pa hala atencion di un chauffeur coriendo marduga den verboden, por poco el a perde su bida.
