E situacion na mundo y na Aruba no ta facil. Na e momentonan aki tur hende riba e pais aki mester por a realisa kico ta e consecuencianan cu Covid-19 a trece cu ne. Ta situacionnan hopi dificil y complica.
Gobierno di Hulanda a pone condicionnan hopi estricto pa pais Aruba pa por duna ayudo financiero na Aruba. Un di e condicionnan ta cu mester corta 5 miyon florin pa luna den gastonan di AZV. Un condicion hopi dificil pa cumpli cu ne den un crisis mundial di salud.
Pa cu esaki no ta keda gobierno di Aruba ningun opcion di busca e posibilidadnan con pa yega na e suma aki. Mester cumpli cu e instruccion di Hulanda sino nan no ta aproba placa pa Fase, loonsubsidie, AZV y SVb cual ta e.o. fondo di pensioen. “Nos tin’e den nos man kico ta e decisionnan cu nos ta tuma.
Sin e prestamo aki nos mester ta consciente cu nos pais ta “crash”. Ta e prestamo aki tin Aruba ta draai un poco ainda. E ta fastioso pa bisa pero esaki ta nos realidad. AZV tin cumpli cu instruccion di Gobierno di Hulanda pa busca con pa reduci e gastonan,’ Minister di Salubridad Publico Dangui Oduber ta bisa.
Di e forma aki mester haci adaptacion den maneho di transporte local como un di e instrumentonan pa baha gasto di AZV. E crisis di covid-19 a causa un impacto mucho mas grandi di loke nos tur por a premira, un ‘normal’ nobo y un realidad nobo. Esaki ta conta pa henter mundo y Aruba no ta diferente,incluyendo nos cuido medico. Siguiendo e instruccion di gobierno Hulanda, AZV a analisa diferente scenario y instrumento cu por wordo introduci pa asina yega na e corte substancial di 5miyon pa luna. AZV ta lamenta cu mester tuma e pasonan aki ya cu e ta afecta no solamente e aseguradonan pero tambe e institutonan of dunadonan di cuido. Pero lamentablemente no tin otro solucion y por spera mas cambio. Importante ta cu e cuido medico (tratamento medico) ta keda intacto.
Un di e instrumentonan pa baha gastonan di AZV ta transporte local. AZV a anuncia cu lo bin cambionan den transporte local di pashentnan. Ta bon pa splica cu transporte no ta regla den e LV UAZV. A opta pa mantene e cuido en bez di mishi cu e cuido y tratamento.
E cambio oficialmente a cuminsa entrante 1 di juni 2020 pero naturalmente tin excepcionnan cu lo wordo duna. AZV ta duna un periodo transitorio cual ta nifica cu e instrumento ta efectivo entrante 15 di juni 2020.
E aseguradonan cu por haci uzo di transporte local solamente ora nan ta den rolstoel of mester wordo transporta via brancard. Aseguradonan cu por cana (no obstante si ta cu medio auxiliar) no por haci uzo mas di transporte cubri via fondo AZV.
E EXCEPCION cu AZV lo brinda ta pa esnan cu realmente NO por cubri e gastonan di transporte y no tin un famia cu por yuda cu e transporte. Esakinan ta bijstandstrekkers y pensionadonan cu tin solamente 1 pensioen di Svb. Pa e grupo aki lo kier introduci un “zorgtoeslag’ pa cubri e transporte. Personanan cu por paga transporte propio of tin famia cu por transporta nan ta wordo spera cu nan lo ta dispuesto pa haci esaki. Pa e grupo aki AZV NO lo cubri transporte mas pa nan.
E aseguradonan cu si por haci uzo di transporte local ta pashentnan cu ta interna den hospital y cu despues di tratamento (wondenpoli of radioterapia) atrobe mester bay hospital pa sigui nan ingreso (sinta, den rolstoel of transporte drumi).
Manera AZV a bisa na inicio, e situacion ta uno hopi dificil y ta afecta cada un di nos. Importante pa gobierno y AZV ta cu por garantisa cu e cuido y tratamentonan medico ta keda intacto.
E ta hopi dificil pa acepta cu nos situacion financiero economico a cambia pero lamentablemente esaki ta e realidad cu nos tur tin cu biba cu ne y acepta. “Hunto so nos lo por supera e temponan sin precendencia aki. No tin un crisis pio cu esaki pero mi ta convenci cu nos lo surpasa esaki. Ban keda positivo aunke con dificil temponan y situacionnan por ta.”
