Despues cu siman pasa a detene Elvis Weert na su cas na Santa Martha (Santa Cruz) pa motibo di un problema familiar y di pareha, a sali varios version pa confirma e forma aki di actua di e presentado di radio y television. Manera ta conoci, Elvis Weert a bini for di Corsou y mesora a gana popularidad riba nos isla, pa su forma unico di presenta e programa di Boca na Palabra na Top 95 FM cu su frase “Kerido Oyente”. Sinembargo, yiunan di su pareha actual a pinta un imagen totalmente mahos di e personahe di media, acusando e di maltrato, di abuso y hasta abuso sexual di nan ruman muhe chikito y grandi. Awe un otro victima di Corsou a surgi y a subraya e hechonan, cu a sosode cune tambe.

Victima na Corsou: Te awe mi no por lubida cu Elvis Weert a cortami y abusa di mi dos yiunan

Victima na Corsou: Te awe mi no por lubida cu Elvis Weert a cortami y abusa di mi dos yiunan

Posted by 24ora on Monday, January 21, 2019

E victima, a tuma contacto cu nos, despues cu el a mira e video di e hoben victima di Aruba y di e ruman muhe di Elvis Weert cu a bula for di Corsou pa bin sostene e mucha na Aruba. E victima awor, kende ta prefera pa wanta su identidad, a topa cu nos awe merdia na Aeropuerto di Corsou, unda ela conta nos su testimonio. El a sinti e curashi pa bin afo, pasobra e kier evita mas victima di e persona aki. Den su caso, e tin dos yiu cu Elvis Weert y e mes tabatin dos yiu caba cu un otro pareha. E dos yiunan di e otro pareha, un mucha homber y un mucha muhe, ambos ta sigura di a wordo molestia sexualmente dor di Elvis Weert tempo cu e tabata cu nan mama na Corsou. Es mas, e mama a mustra nos un corta basta profundo na su brasa, cu sicatris bisto, despues cu Elvis Weert a cort’e cu cuchiu un marduga na su cas. Esaki despues di 1 aña cu e relacion a termina.

E susedido aki a tuma luga na aña 2000 y e tempo ey e victima a bay Polis, a bay Voogdijraad y a logra kita e yiunan for di Weert. E mama a mustra nos henter un dossier di Voogdijraad y sentencia di Hues na Corsou, den cual ta constata tur e susedidonan cu e mama y cu e dos yiunan. E caso sinembargo no a continua pasobra Weert a suplica e mama pa no denunci’e mas y laga e caso cay pa nan no cer’e. E mama, ex pareha di Weert, a opta e caminda civil pa e por keda cu e muchanan y no a cana e caminda penal mas.

Pero, awe e ta mira cu e mala maya no ta bay. E mesun tipo di abusonan cu el a wanta na man di e homber aki hopi aña pasa na Corsou, parce di ta sigui na Aruba atrobe. “Mi kier evita y mustra e victima hoben di Aruba cu e tin un sosten den mi. Ta dor di para hunto y fuerte, nos por evita cu tin mas victima ta cay na man di dje”, asina e victima a duna di conoce. “Pesey mi a yama Boso di 24ora.com, pasobra despues di a mira e video, mi no por a come mas, no por drumi mas, pasobra mi ta sinti cu mi mester a papia. Mi a manera haya un flashback di e susedidonan. E coas aki mi no ta desea ni na mi pio enemigo”, asina e señora a termina bisando.

Comments

comments