Abogado Chris Lejuez ta representa 10 di e 23 sospechosonan cu awe a aparece dilanti di hues. A scucha entre otro e demanda di ministerio publico. Dos fiscal a haci peticion di diferente castigo pa e 23 sospechosonan envolvi den e Caso Ibis.
Abogado Lejuez a comenta cu e ta haya cu e ta valt mee. Pasobra cu di e 23 hendenan cu fiscal a sinti ta necesario pa trece nan dilanti hues, ta solamente pa tres di nan a pidi castigo di prizon.
Pa e resto a pidi castigonan di trabao pa comunidad. E castigonan ta varia di 30 ora di trabao, cu ta hopi abao, te pa e maximo di 240 ora.
Mayoria di nan ta diferente, pero pa Lejuez e ta valt mee. Ainda e defensa no a cuminsa. No tabata tin defensa ainda, pasobra durante e defensa, ta sigur cu tin varios di nan cu ta pidi pa declara nan liber, pasobra nan no a forma parti di ningun crimen, ni ningun hecho castigabel cu nan lo ta envolvi den dje.
No sa ainda kico e resultado ta bay ta.
E ta conta pa e tresnan cu a haya un demanda tambe. Ta demanda e ta, no ta e castigo ainda, segun Lejuez. Hues tin cu dicidi esey ainda. Si e defensa ta hopi bon, e castigonan lo baha hopi, abogado Lejuez a menciona.
Un caso cu tin su kostenplaatje
Si coy tur e temporada, e caso aki ta costa masha hopi mes. No mester lubida, a ripara den e caso aki cu a bin cu hende special for di Hulanda pa yuda cu e investigacion. Tabata tin un team extenso di RST trahando riba dje.
Un team cu a traha bao di e nomber Ibis, cu number, enbes di nomber, di cual defensa no a haya sa nunca ken nan ta.
Landsrecherche tabata tin nan hendenan ocupa den e caso aki. E caso sigur tabata tin su kostenplaatje.
Castigonan
Loke cu Lejuez a mira, cu e caso mes, loke a pone riba mesa, tabata hopi mas pisa di locual e ta aparenta. E caso ta mustra di ta mas pisa di loke ta pensa cu lo tabata. E personanan cu tabata envolvi, hopi di nan tabata envolvi menos di loke a aparenta. Tin hende a wordo treci padilanti, door cu por ta un biaha nan a tende un combersacion, na e mesun momento cu tabata cumpra ticket, pero a papia alabes over di ontheffing. Fiscal a pone nan hunto cu un tin e relacion cu e otro, unda cu esey no tabata e caso. Tin di nan cu ta mas serio. Tin cu ta menos serio. Cuminsando diamars, lo bay tende e otro banda di e personanan aki.
Casonan similar
Abogado Chris Lejuez a yega di presencia cu pa ambtenaar a pidi castigonan di ontzetting uit het ambt, esta cu nan no por ta ambtenaar mas pa un temporada di 3 pa 5 aña. Pero pa un minister no por bisa asina. Unico caso cu el a defende den pasado, tabata minister Tico Croes, kende a haya 240 ora di trabao pa comunidad, cu despues e mes a dicidi di revoca of trek in su apelacion. Pero esey tabata un otro caso, segun Lejuez.
Defensa
Tur cos ta depende di e posicion cu e cliente di Lejuez tuma. E tin cliente cu a admiti di a haci cierto cosnan. Ta un otro defensa ora cu un cliente bisa cu nunca el a haci tal cos. Si un ciente bisa cu e no a haci’e nunca, bo tin mas trabao, pasobra bo tin cu bay demostra awo, cu e ta inocente. Si un hende bisa cu el a haci tal y tal cos, e ora e ta menos dificil pa e defensa. Defensa por bisa cu e cliente a admiti. Tur loke a papia riba dje, ta con halto e castigo por ta, si e ta mucho halto of mucho abao.
Cuchiu cu ta corta ambos banda
Dos tramitador ta sospechoso pa bay cera. Fiscal a tene cuenta cu esun cu ta pidi, pero esun cu ta duna tambe. Abogado Lejuez a splica cu semper ta asina. Bo mester tin dos. Tin uno cu ta cumpra y uno cu ta entrega. Esun cu ta paga y esun cu ta ricibi.
Pesey nan tin un nomber cu ta Omkoping. Uno ta pasieve omkoping y e otro ta actieve omkoping. Pasieve Omkoping ta esun cu ta haya, den e caso aki por ehempel diferente persona a wordo acusa, entre otro Paul Croes, di pasieve omkoping. Y un cantidad di otro persona a wordo acusa pa actieve omkoping. Nan lo a duna placa pa nan a haya ontheffing of vergunning cu nan tin mester. Di tur dos por haya den e caso aki.
