E siman aki y otro siman lo ta dianan basta pisa den Corte. Lo trata casonan importante den Corte di Prome Instancia y algun caso grandi den apelacion. Un di esunnan di e siman aki lo ta e famoso Vacuna Gate cu a haya e nomber di Anglo. E caso a bini mas cu un biaha caba den Corte di cual un di nan tabata un Regie Zitting. A haci diferente preparacion pa por yega na un fecha definitivo pa cu e tratamento.
E famoso Vacuna Gate den cual tin algun ex-trahado di gobierno (Directie Volks Gezondheid D.V.G.) ta involucra. Nan tabata traha cu Gobierno via di contracto. Ta trata di e acusadonan Jonathan R. Ridderstap, Gerald G.G. Olivir y Maikel G.J. Maduro. E dos prome nan ta asisti pa abogado mr. John Zara y mr. Diana Emerencia y e ultimo acusado tin como abogado mr. Desiree Croes.
Ta acusa e trio cu den e periodo di 1 di maart 2021 te 14 di december 2021 y conhuntamente cu seis of mas persona, a participa na un organisacion cu tabatin como meta comete crimen como proposito, esta, falsifica prueba di vacuna y/of facilita prueba di vacuna contra regla. Tambe ta acusa nan cu den e periodo di 1 di maart 2021 te 14 di december 2021 y como ambtenaar den funcion di contratista na DVG, a tuma placa pa registra vacuna y/of hinca informacion den e sistema di data di DVG, sabiendo cu e vacunanan aki no a tuma luga y cu ta uza e informacion ey pa un registro incorecto di vacuna. Ta acusa Ridderstap tambe di posesion di cocaina riba 14 di december 2021.
E tres personanan aki ta den libertad caba y aunke cu e impacto di nan acto ta grandi, a daña imagen di e sistema den Salud Publico, probablemente lo no haya un castigo cu ta manda nan pa KIA na Sero Patia.
HOF: Caso contra e Shaman, Izaak Principaal y Belmont Pieternella
Interesante tambe ta e casonan cu tin otro siman riba rol pa loke ta casonan di apelacion. Dialuna tres hues for di Corsou lo trata pa 10:00 am e apelacion di Carlos Illapuma. Esaki ta e Shaman cu a mishi cu su clientenan. Den Prome Instancia el a haya un castigo di 4 aña. E mucha homber Izaak Principaal teni responsabel pa asesinato di e mucha muhe Sayuri Petronia di 19 aña di edad, su caso lo ta pa 2:00 pm. Izaak a haya un castigo di 9 aña y TBS. Esaki ta nifica cu despues di sinta su castigo, e ta bay na disposicion di Gobierno pa haya tratamento. E tin fecha di drenta pero no di sali.
Diamars dia 20 di juni tin e caso contra Belmont Pieternella, acusa di a abusa di su pareha den weganan sexual, di a tatua henter su curpa. E no tabata di acuerdo cu e 6 añanan di prizon cu el a haya como condena. Por a compronde cu defensa lo bini cu dos testigo, e victima y un otro dama.
