Diasabra ultimo, Fundacion Autismo, a organisa un tayer di gran importancia, dirigi n’e educadornan di scol secundario y avansa. A organisa e evento aki cu e obhetivo di proporciona herment y conocemento esencial pa enfrenta e retonan specifico cu e studiantenan cu autismota experencia, tabatin un bon participacion y sosten valioso soten di Hyatt Regency.
Segun presidente di e fundacion, Carolina Thiel-Span, e tayer a enfoca pa tende e dificultadnan cu e studiantenan autista ta enfrenta ora di drenta un scol nobo y mas grandi, specialmente durante pubertad. Thiel-Span a splica cu e studiantenan ta pasa di ta den un klas cu un solo docente pa tin shete of ocho den un solo dia, loke ta representa un cambio significativo y desafiante.
E transicion aki ta genera varios pregunta entre e mayornan como tambe entre e educadonan, kendenan tin mester di orientacion y sosten pa maneha e situacionnan aki di manera efectivo.
Thiel-Span a subraya e importancia di mantene un contacto estrecho cu e veld educativo traha den e desaroyo di capacidad basa riba e necesidadnan y e preguntanan observa. E tayer a sirbi no solamente pa proporciona informacion y herment n’e educadornan, sino tambe pa scucha y compronde e retonan cu e profesionalnan ta enfrenta den nan trabao diario. Esaki ta permiti e fundacion adapta nan strategia y recursonan n’e necesidadnan real di e ambiente educativo.
Recientemente, Fundacion Autismo a reinstala e comision nacional cu e obhetivo di atende e retonan aki di manera sistematico na nivel nacional. E iniciativa aki ta busca pa crea un sistema mas eficiente p’e educadonan por traha di manera efectivo cu e studiantenan autista, mehorando asina e ambiente di trabao y sigurando cu tanto e studiantenan como nan famia ricibi e trato adecua y nan sinti nan sigur.
E tayer tabatin un gran acogida, cu mas di 90 inscripcion inicial y cerca di 70 persona presente. E exito aki tabata posibel danki n’e compromiso di Hyatt Regency, cu a sostene e proceso di alcansa diferente grupo. Durante e tayer, a confirma hopi hipotesis y a revela e esfuersonan cu ta realisando pa crea mehoracion den klas. Fundacion Autismo a expresa su satisfaccion cu e resultadonan y a desaroyo di e tayer, destacando e importancia di e iniciativanan aki pa avansa na un educacion mas inclusivo y efectivo pa tur studiante.
