Comision Europeo pa Prevencion di Tortura y Trato Inhumano (CPT) den 2022 a bishita Aruba, como parti di Reino Hulandes. Nan ta controla con e trato di detenidonan ta na Warda di Polis, na centronan di detencion y KIA. Den un parti di e rapport por lesa manera cu e comision aki a fada di spera cu Aruba ta ehecuta recomendacionnan pa haci cambio den e Codigo di Procedimento Penal. Cambio cu ta spera un decada pa haci pero te ainda nada. Nan a bisa Gobierno pa traha riba dje y manda e cambionan pa nan mira.
CPT a haci apelacion na autoridad di Aruba pa revisa e sistema di detencion na wardanan di polis, cu e meta pa baha e dianan cu ta wanta hende eyden cera. Y e discusion riba e tema aki mester bay den cuadro di e Codigo di Procedimento Penal nobo cu mester bini cu ne.
Pa mas cu un decada a bin ta tuma luga discusionnan riba e codigo nobo aki, den tur parti di Caribe Hulandes. E codigo aki mester trece cambio significativo cu ta importante pa CPT. Asina por ehempel, e periodo inicial den custodia policial den e codigo nobo mester ta tres dia y por prolonga un biaha so. Pues, en bes di keda dies dia cera den cel na ward’i polis, lo por keda te cu un maximo di seis dia. Despues di e seis dianan mester manda e detenido pa KIA. Tambe ta menciona e derecho di personanan deteni pa consulta cu nan abogado prome cu interogacion policial.
E delegacion a haya informacion durante nan bishita cu e tema di introduccion di e codigo nobo ta bay wordo discuti un biaha mas den futuro cercano durante reunion di e Ministernan di Husticia di Hulanda y cu esnan di Aruba, Corsou y Sint Maarten. CPT a informa Gobierno cu nan kier haya update riba e tempo cu lo mester pa yega na e cambionan y pa e codigo nobo drenta na vigor. Pero tambe detaye di e cambionan cu lo bay introduci cu e ley nobo.
Y nan ta spera cu e CPC nobo lo tene cuenta cu e recomendacionnan y comentario den e informe ki, particularmente pa loke ta e tempo limita di detencion den custodia policial (e derecho di acceso na un abogado, atencion medico y e derecho pa informe un di tres persona di su detencion, como tambe e obligacion di informa un detenido di e derechonan aki).
