Gobierno di Aruba a informa awe cu RIVM di Hulanda a identifica 47 caso mas di e variante di Reino Uni na Aruba. Manera ta conoci, tur siman ta manda testnan positivo di Aruba pa Hulanda pa analisa. Recientemente a manda un cantidad di 105 test y for di e lote aki a identifica 47 caso mas di e variante di Reino Uni.
Tambe RIVM a confirma cu den e testnan ricibi, cu a logra identifica e prome 2 casonan di e variante di Sur Africa. Esaki ta algo nobo y ta haci e asunto mas serio. Dicon? Pasobra e variante di Sur Africa parce ta mas peligroso cu e otronan, mientra cu e demas variantenan ta mas contagioso.
Pues na Aruba a identifica un total di 97 caso di e variante di Reino Uni, 2 di Sur Africa, 8 Mexicano, 3 di California y 1 caso di e variante di Brazil. E variantenan aki ta mas agresivo y ta acelera e proceso di infeccion cu por causa problemanan serio di salud y compromete e capacidad di cuido na Hospital.
Un mensahe ta bay na comunidad pa sea extra cauteloso y sigui cumpli cu e reglanan di distanciamente social, uza tapaboca y laba man frecuentemente.
Na momento cu bo sinti cu bo tin sintoma, no keda cana rond, bay haci test y isola bo mes pa no sigui plama e virus.
