Parlamento di Aruba tin un ley pendiente pa aproba cu lo permiti pa habri e mercado pa bin cu na mas loteria, eliminando asina e exclusividad parcial pa wega cu premionan grandi cu actualmente Fundacion Lotto pa Deporte (FLPD) ta disfruta di dje. Esaki segun Craig Bascombe di Canadian Bank Note (CBN), den un carta dirigi na presidente di parlamento, mr. Juan Ady Thijsen.E carta ta sigui bisa cu esaki ta hinca den un proyecto di ley Landsverordening Toezicht Kansspelen (Ltk) di siman pasa.
Segun e carta di Bascombe, lo tin votamento den parlamento dia 24 di maart 2021, sin cu a consulta cu nan riba e concesion di permiso di loteria y sin cu a consulta e sector aki prome cu e comite responsabel implementa e rekisitonan Hulandes a cambio di prestamonan relaciona cu COVID (Landspakket). Si aproba e ley aki den su forma actual, segun Bascombe, esaki lo provoca perdidanan economico masivo pa deporte na Aruba y tambe pa e empresa (CBN). Por lo tanto, nan ta kibra cu nan silencio.
E carta ta continua: “E hecho cu kier habri e mercado di loteria na Aruba pa mas loteria genera mas ganashi pa gobierno of pa bon causa ta uno eroneo. Tambe ta poco probabel cu e hungadonan cu ya ta ganando mas den loteria cu mayoria di e hungado den paisnan avansa, gasta mas pasobra tin mas operador di loteria pa scoge. Ta contrario, cu tur probabilidad e resultado di e ley aki lo ta cu mas organisacion di loteria lo competi pa e mesun cumpradonan di ticket, mientras cu e benta total di loteria riba e isla lo sigui ta mesun cos. E ganashinan netto disponibel pa bon causa simplemente lo bira menos.
Awendia, Loteria di Aruba ta ofrece e unico weganan di loteria cu un premio grandi na Aruba. Ta weganan nacional. Door di permiti pa otro loteria ofrece wega cu premionan grandi lo haci cu e premionan grandi lo baha mas ainda. E hungadonan di loteria ainda ta motiva pa premionan grandi, no pa mas chikito, pa cual e benta nan general y ganashi pa bon causa solamente por calcula cu nan lo baha. Competencia por ta algo bon pa consumidornan riba algun mercado, pero manera Hulanda y otronan a reconoce claramente, no ta e caso di weganan di loteria. Sin duda e reputacion di Aruba en general pa loke ta siguridad di inversionnan di afo lo ta afecta.
Ta inimaginabel cu e perdidanan sufri ta decenas di miyones di florin durante e plaso restante di e contract di servicionan di maneho di loteria. Nos no lo tin otro opcion pa busca un compensacion pa e perdida nan aki for di gobierno di Aruba. E urgencia di e situacion aki den termino di daño potencial di nos interesnan economico y e apoyo pa bon causanan na Aruba den futuro, ta obliga e peticion aki, pa e miembronan di parlamento tin suficiente tempo pa evalua adecuadamente e implicacion nan pa permiti mas loteria opera wega cu premionan grandi na Aruba, door di elimina e disposicion nan di loteria for di e proyecto di ley aki.”
Por ultimo CBN a menciona den e carta cu nan ta mas cu dispuesto pa discuti tur posibilidad cu parlamento.
Loading…
Reload document 
Open in new tab 
