Empresario y doño di e cadena di supermercado, Gerard van den Tweel (73) ta bendiedo su supermercadonan na Boneiro, Corsou y Aruba. Esaki ta despues cu Van den Tweel a manda un carta dia 3 di Mei ultmo na e trahadonan di e supermercadonan.
Pa loke ta e doño nobo, cu fam Azan, hopi no ta conoci di dje, cu excepcion cu e empresario lo tin e experiencia necesario den e branch. Ta trata posiblemente di Gassan Azan, un empresario di Jamaica di cual e marca Bascho y Mandeville MegaMart tin diferente supermercado.
Pero asina mes, Van den Tweel toch lo keda pa e proximo cuater añanan envolvi cu e supermercadonan riba e islanan. Tambe e ta bisa cu e lo keda mantene e contacto cu e supermercadonan. “Pa e proximo cuater añanan, mi lo ta envolvi den e maneho y lo boso wak mi regularmente riba e islanan,” segun Van den Tweel, cu tambe a skirbi den e carta di ta hopi orguyoso pa a lanta e tiendanan hunto cu e trahadoinan den e ultimo añanan.
Pa e trahadonan, na prome instante, no mucho lo cambia; e hefe di supermercado ta bisa den su carta na e trahadonan, cu e condicionnan di trabao di e trahadonan no lo cambia.
Ling & Sons Supermarket ta e ultimo adkisicion di Van den Tweel, cu ta suma un total di 5 supermercado cu lo haya un doño nobo.
Gassan Azan kier crea un hub pa posibel expansion na otro paisnan. E supermercado di Van den Tweel den Suriname y Bonaire Food Group ta keda toch completamente den mannan di Van den Tweel.
Motibo di benta
Motibo pa e traspaso di accionnan ta e edad di Van den Tweel. “Mi tin 73, y mi tin cu cuminsa pensa con mi lo mester sigui. Mi yiunan cu ta activo cu mi tiendanan na Hulanda, no tin ningun ambicion riba e islanan den Caribe.”
