Minister di Naturalesa a demanda su colega minister presidente Evelyn Wever-Croes, pero e mandatario a hala atras e demanda di Aruba Birdlife Conservation y su ministerio. E mandatario a stop e trabounan di desaroya un beach dilanti e proyecto di Embassy Suites.
Minister di Naturalesa Ursell Arends a splica cu tur hende a nota kico ta pasando den e ultimo dianan, e ontheffing ta parti di ley. E ta di pensamento cu cualkier desaroyado ta bay desaroya mester cumpli cu ley. Como Ministerio di Naturalesa e Natuurbescherming verordening ta regarda cu si kier mishi of kibra cualkier especie protegi, mester pidi cualkier ontheffing.
Esey ta algo cu e ministerio ta keda para ariba. E ta spera cu dentro di poco nan por ta na mesa y yega na un solucion pa loke ta trata e beach cu kier desaroya dilanti e hotel.
Segun Arends, e no ta lamenta, pero mas bien su persona a declara c’un eror a tuma luga den e proceso con el a cana. E ta kere door cu a aclaria esey caba, awo nan mester sigui traha y move padilanti. El a tuma nota di tur comentario y incertidumbre crea, pero na final di dia e meta ta pa trece balans entre desaroyo economico y naturalesa.
Como Minister di Naturalesa, e tin cu percura cu naturalesa ta respeta y trata den un forma cu ta cumpli cu ley. Esey ta algo cu e lo sigui haci.
Eror cometi
A puntra e mandatario riba e eror haci y si un hende ta bay sinti repercusion, si ta eror di e ministerio of eror di bufete di abogado. E mandatario a splica cu esaki ta algo cu nan a atende internamente. Arends ta kere cu dentro di poco e lo por trece mas dilanti riba e tema. Tambe e ta kere di sinta na mesa y papia riba nan. E no ta kere cu ta necesariamente tira hende bou di bus.
Nan lo atende cu esaki y dentro di poco esaki lo bira conoci. Esun cu a haci lo mester carga e responsabilidad. Arends a enfatisa cu esaki tabata un eror. “Nunca tabata pa cuminsa caso contra Gobierno di Aruba. Y esaki ya caba ta tras di lomba”, el a insisti.
Pa mas lesa TREMPAN.COM.
