Tin dos luna caba cu AruParking ta den funcion. Minister di Transporte tin un bon bista con cos ta andando. AruParking a haya acogida, pero e mandatario no sa cuanto hende a ricibi boet
Ursell Arends, Minister di Transporte, a indica cu dos siman pasa, esta dia 9 di juni, el a reuni cu e comerciantenan cu ta representa centro di ciudad pa haya nan input y feedback con cos a bay cu AruParking despues di un luna. Dialuna ultimo a sinta un biaha mas cu e comerciantenan pa haya nan feedback y mira unda por bin modificacion.
Aworaki nan meta ta pa dia prome di juli reintroduci cu tram por cuminsa core bek den Caya conhuntamente cu e trafico. Esey ta e cosnan cu nan ta bay traha riba dje den e dianan venidero. Asina e luna di juli cuminsa cu trafico y tram por coexisti y pasa den Caya Betico Croes.
AruParking ta bay den bon direccion
E cifranan cu e mandatario a haya di AruParking, ta mustra cu esaki ta bayendo den bon direccion. Pocopoco mas hende a cuminsa sostene AruParking. Fo’i parlamento, mas parlamentario ta contribui cu nan permiso di parkeer.
Loke e minister kier a logra cu reintroduccion di AruParking, ta pa trece ordo den centro di ciudad. Esey tabata basa riba tres punto cu ta mobilidad, regulacion y control. Ta logrando esey y Arends ta kere cu semper tin espacio pa mas mehoracion. Nan ta cu horea habri pa scucha feedback for di tur esunnan cu ta afecta, pa mira unda por modifica pa tin un sistema cu ta trahando cu contribui positivamente n’e desaroyo di centro di ciudad.
Esey ta nan meta y unabes cu nan scucha for di tur hende envolvi, e modifacionnan cu nan haci lo ta pa miho. E mandatario ta convenci cu nan ta bayendo den bon direccion y por mira cu e aceptacion di comunidad ta mustra positivo.
Evaluacion
Prome minister a bisa di tabata evaluando e asunto di AruParking. Segun Arends, ta kere cu ta evalua tur cos gobierno efectua. Su persona no tin miedo di evaluacion. Pero, mester tene cuenta cu AruParking ta un compania estatal riba su mes, pero e moeder bedrijf ta Arubus.
E mandatario ta respeta e regalanan di corporate governance. Tin un Raad, di cual su persona no ta sinta n’e stoel ey. Pero e ta papia cu Raad, haya feedback como reportahe di nan.
Minister di Transporte ta contento con cos ta bayendo y ta spera cu e otro ministernan ta satisfecho cu e meta poni dilanti pa AruParking, di cual nan por logra nan. Tin mama y tata cu ta depende di e trabou di AruParking. E orden cu nan kier trece den centro di ciudad, ta solamente si tin un AruParking funcionando optimalmente lo por logra esey.
Boet reparti
Pa loke ta trata boet, segun e mandatario tin henter un sistema traha pa loke ta trata e beleid na momento di duna un proces-verbaal. E tin su trayectoria pa cana. Arends no por a bisa cuanto boet tabata duna.
