UNOCA ta duna oportunidad pa haci peticion pa proyectonan relaciona cu e celebracion di 35 aña di Status Aparte y 45 aña di Himno y Bandera
Cultura ta un di medionan cu mas ta bin dilanti durante celebracion di 18 di maart, p’esey, pa UNOCA ta importante pa enfoca mas cu usual riba e nificacion esencial di nos simbolonan: Nos himno, nos bandera, nos escudo, nos idioma y nos moneda.
Aña 2021, ta marca sigur un aña special pa Aruba, mirando cu nos ta celebra 35 aña di Status Aparte y 45 aña di Himno y Bandera. Sinembargo e aña aki, mescos cu aña pasa, Aruba ta bibando temporadanan dificil di un pandemia cu ta haci imposibel pa e pueblo por celebra e dia nacional, manera ta custumbra. E celebracion e aña aki, lo mester wordo haci den un forma adapta.
Posibilidad pa haci peticion pa proyecto
Den e cuadro aki, UNOCA ta habri e posibilidad pa personanan of organisacionnan por haci peticion relaciona cu e festividad nacional aki, cu a bira un custumber importante pa pueblo di Aruba. UNOCA como fundacion pa desaroyo cultural, ta haya necesario pa Aruba uza e dia nacional como momento di reflexion riba e momentonan di crisis financiero, economico, politico y di salubridad cu ta biba aden, den combinacion cu e aspectonan di e simbolonan nacional y e gran logro di Status Aparte.
Celebracion Nacional y importancia di e simbolonan nacional
Proyectonan cu lo haya prioridad, ta proyectonan cu ta enfoca riba simbolonan nacional. Kico ta historia di Aruba su simbolonan nacional? Kico nan ta representa y kico ta nan diferente metanan? Con e simbolonan aki ta caracterisa e pueblo Arubano y e Arubiano? Con e simbolonan nacional por duna guia y sostene Aruba pa pasa den temponan dificil manera e pandemia cu ta bibando aden awor y kico por siña di e simbolonan den e situacion actual? Con simbolonan nacional por yuda e pais lanta atrobe y traha pa un miho futuro? Con simbolonan nacional por yuda fortifica y promove conocemento di Aruba su historia, amor pa patria y deseo pa progreso individual y colectivo? Con simbolonan por yuda e pueblo fortalece su sentido di union social y dedicacion na un desaroyo holistico y inclusivo riba tereno di desaroyo social, economico, educativo, cultural, medio ambiental, gubernamental, cuido medico, etc.?
Fondonan Limita
Pa UNOCA, mescos cu tur otro fundacionnan subsidia pa gobierno, tambe ta conta un reduccion den subsidio pa aña 2020. Esaki ta nifica cu UNOCA tambe mester corta gasto y bin cu reglanan mas estricto pa co-financiamento di proyecto. Pa e proyectonan aki, ta conta un suma maximo cu UNOCA por co-financia di Afl. 10.000,=. Tur otro rekisito pa aplicacion di UNOCA ta keda valido. Por haya esakinan riba e website: https://unoca.aw/info-on-application/
