DVG: Ta premira cu diahuebs awo prome batch di vacuna ta caba

Ta apenas 2 siman pasa cu Aruba a ricibi dia 16 di februari su prome ‘batch’ di 11700 vacuna di marca Pfizer contra COVID-19, y ya caba pa diahuebs awo dia 4 di maart ta premira cu mayoria lo caba. Segun e plan Nacional di vacunacion e prome ‘batch’ di 11700 vacuna tawata destina pa esnan laborando den cuido y pa cuminsa e suministro di vacuna na nos adulto mayor di 60+.

Segun planificacion e di dos ‘batch’di 11700 vacuna lo ta yegando Aruba den e siman di 8 di maart, cu ta net 3 siman despues di e prome ‘batch’ y ta destina como segundo dosis pa e 11700 personanan cu a haya nan prome vacuna caba.

Den e siman di 29 di maart DVG ta enespera di e di 3 ‘batch’ di vacuna cu lo fungi un bes mas como e prome dosis pa e restante di adulto mayor di 60+ y dunadornan di cuido cu no a logra haya nan prome dosis ainda y asina cada 3 siman ta programa cu Aruba lo por haya vacuna dependiendo di e demanda di comunidad.

Durante e proximo simannan cu Aruba ta enespera di vacuna, ta importante pa comunidad sigui registra. Rond mundo na e momento aki vacuna ta schaars pero gobierno di Aruba ta haci su maximo esfuerso pa delibera cu Hulanda pa haya e cantidad nesesario di vacuna pa cumpli cu e demanda di Aruba.

Den e proximo simannan ta esencial pa comunidad di Aruba sigui registra. Registra pa ora cu e siguiente ‘batchnan’ di vacuna cu ta programa yega bo persona por haya un invitacion pa pasa y ricibi bo vacuna.
Pa registra por haci esaki via Aruba Health App, via e websitenan www.dvg.aw tambe www.arubacovid19.org of na cualkier edificio di MFA rond Aruba.