Union Europeo a impone un multa record di 4.3 biyon Euro riba Google, relaciona cu e plataforma di celular Android. Mas o menos 85% di tur celular na mundo ta uza e sistema di operacion Android. E resto di mercado ta den mannan di Apple. Ta acusa Google cu e ta maluza su poder pa domina e mercado, haciendo dificil pa otro companianan tin un chens pa desaroya of crece cu nan producto.
Concretamente Union Europeo tin problema cu e forma con ora clientenan cumpra un celular nobo marca Samsung of Huawei, cu automaticamente ta haye cu appnan pre instala riba dje caba, manera YouTube, Google Docs y Google Maps. Di e forma aki Google ta pusha su concurencianan for di mercado, asina Eurocommissaris Margarethe Vestager ta haya.
Desde dos aña pasa caba Google a defende su mes di tur e acusacionnan procedente di Brussels. Google ta subraya cu Android a haci mundo un fabor grandi, pasobra nunca antes tabatin tanto hende cu por a cumpra un celular, specialmente un Smartphone. Di otro banda e diseñadornan di apps tambe ta contento pasobra e sistema ta facil y no ta rekeri mucho rekisito manera Apple si ta exigi pa ta riba su plataforma. Pa loke ta e appnan pre instala, Google a garantisa e Comision Europeo cu no a obliga ningun compania pa download nan app riba nan celular.
Mas den su defensa, Google ta puntra su mes si e Comision di Union Europeo no a analisa e celularnan cu ta uza e sistema IOS di Apple cu tambe ta haci e mesun practica. Es mas, e usuario ta liber sea pa download otro appnan of pa delete appnan cu el a haya den e celular ora cumpre, si acaso e no ta of kier uza nan.
E suma di 4.3 biyon Euro ta hopi, hasta pa un gigante manera Google. Leynan ta duna e Comision Europeo e poder pa impone un multa te cu 10% di e entrada anual di e compania. Den caso di Google, esey ta 9.5 biyon Euro. Pero Union Europeo no a uza e peso maximo ey nunca ainda.E record prome cu esaki tabata pa e mesun Google, cu aña pasa a haya un multa di 2.4 biyon Euro pa su formula di comparacion di prijsnan. A acusa nan di ta beneficia su mesun companianan y productonan. E problema obviamente no ta e multa, sino e hecho cu Google mestrer adapta su maneho.
Cu e decision nobo aki, sin duda e Comision di Union Europeo sin duda lo exigi adaptacion. Ta anticipa cu Google lo apela e decision aki. Esey no ta nada nobo, Microsoft tambe a haci esaki den pasado, ora a dun’e un multa pa su sistema di operacion Windows. Mescos cu Google awendia riba celular, e tempo aya Microsoft tabata beneficia su mesun productonan “Internet Explorer” y “Media Player”. Di e forma ey el a garantisa ambos cu un bon posicion competitivo den mercado.