Awe mainta a tuma lugar un ceremonia festivo di naturalisacion. E ceremonia aki ta un encuentro special pa ciudadanonan cu ta haya e nacionalidad Hulandes. Durante e ceremonia e persona ta haci declaracion di sentimento di vinculo cu Reino Hulandes dilanti Gobernador interino di Aruba, Yvonne Lacle-Dirksz.
Un total di 77 persona procedente di 15 diferente pais a huramenta of a priminti di ta sinti nan mes parti di Reino Hulandes y cu nan conoce e leynan di Reino Hulandes y cu nan lo atene nan mes na e leynan aki. Di es manera aki nan a haya e nacionalidad Hulandes formalmente, incluso e obligacion y derechonan cu e nacionalidad Hulandes ta trece cune, manera entre otro e derecho di voto activo of pasivo y e paspoort Hulandes. Mas o menos 3 of 4 biaha pa aña Aruba tin un ceremonia asina di naturalisacion. 
Con ta aplica pa nacionalidad Hulandes
Por haya nacionalidad Hulandes na dos manera, via opcion of via naturalisacion. Cada un ta cana nan mesun procedura. Pa tur dos procedura mester entrega documento oficial manera entre otro acta di nacemento, acta di matrimonio, paspoort y e permisonan di estadia.
Naturalisacion
Por pidi pa haya nacionalidad Hulandes pa medio di naturalisacion. Pa bin na remarca pa e procedura di naturalisacion, e persona mester cumpli cu cierto condicion, entre cual un estadia di 5 aña consecutivo den Reino Hulandes cu permiso di estadia valido, pasa e examen di integracion cu exito y no tin un condena pa un delito den e ultimo 5 añanan. Mester entrega e peticion pa naturalisacion na Gabinete di Gobernador di Aruba. Minister di Siguridad y Husticia di Hulanda tin e autorisacion pa evalua e peticion y tuma decision.
Opcion
Den algun caso por haya e nacionalidad Hulandes pa medio di haci un declaracion di opcion. Esaki ta conta pa un grupo specifico menciona den e ley. Ta trata por ehempel di personanan cu berdaderamente ya desde nan nacemento ta biba den Reino Hulandes y tin permiso valido di estadia. Ta entrega e peticion pa declaracion di opcion tambe na Gabinete di Gobernador di Aruba.
