“Nos tur ta den luto. Comunidad henter ta den shock pa e susedido tragico aki”, asina dr. Armando “Rudy” Lampe, Minister di Enseñansa a duna di conoce durante un ceremonia cortico di 1 minuut di silencio teni durante un reunion cu directiva di Dienst Publieke Scholen y Directie Onderwijs. “Esaki ta un señal di respet y solidaridad na famia di e victima”.
E scol Comandeur Pieterboer School mes tambe ta resorta bou di DPS. Nan tambe ta lamenta e susedido masha. A interumpi e reunion awe mainta pa tene e minuut di silencio aki.
E mandatario a señala cu e problema di abuso di mucha ta hopi serio. For di aña 2013 caba UNICEF a traha un rapport riba e situacion di muchanan na Aruba, den cual a señala cu tin “verwaarlozing” di mucha, banda di abuso fisico y sexual.
“Awe ta e momento pa nos cuminsa papia y tuma accion, pa para e tipo di abusonan aki. Muchanan mester ta centro di tur cos, muchanan mester di proteccion, mester protehe nan 18 aña largo pa nan por crece y bira independiente despues como adulto. Ta henter comunidad mester uni pa por lanta un mucha”, asina e mandatario a duna di conoce.
Separa di e ceremonia den Conseho di Minister, tambe na varios scol a organisa 1 minuut di silencio pa e mesun causa.
