Tur aña, rond Caribe piscadonan ta rindi tributo na e santo patrono di piscado riba dia di San Pedro cual ta 29 di juni.
Centro di Pesca Hadicurari combinando forsa cu Santa Rosa (LVV) tur aña, manera ta e tradicion, ta celebra esaki cu un tremendo competencia di pesca hunto cu un dia di famia na e centro di tur piscado na Palm Beach, Noord. E aña aki atrobe ta spera mas di 30 boto di tur skina di Aruba uni forsa pa celebra e dia aki grandemente treciendo hopi pisca pa publico gosa di nos recurso peskero. Di awor caba ta pidi tur hende reserva e fecha.
PA KICO UN DIA DI PISCADO?
Piscamento, aunke e di 2 ofishi di mas bieu, no ta conta cu gran popularidad y hopi biaha ta ser hasta lubida. Es mas hopi biaha piscadonan ta sinti cu nan ta bira victima di modernisacion y tratadonan internacional cu ta afecta nan inhustamente sin tene cuenta cu derechonan. Dia di piscado a keda institui pa enfoca atencion riba e trabou di piscado, kico piscamento ta nifica pa nutricion di hende y e retonan cu piscadonan ta enfrenta. E dia ta sirbi como refleho pero tambe celebra e ofishi di piscado.
Piscamento ta parti integral di e cultura di Aruba. For di tempo di Indian, na Aruba tabata depende di lama y piscamento. Na excavacionnan arkeologico na e.o. Tanki Flip, a haya restonan di calco y varios especie di pisca y turtuga, indicando cu e prome habitantenan di nos isla tabata piscado. E tradicion di piscadonan ta uno ancra den barionan di piscado manera Noord, Rancho, Savaneta, y otronan.
Riba dia di piscado, ban duna piscadonan e aprecio y reconocimento cu nan merece. Riba dia di piscado, ban stimula interes di hobennan den e tradicion di piscamento, participa activamente na Dia di Piscado.
HOPI ACTIVIDAD NA HADICURARI:
Riba diadomingo 1 di juli lo tene e celebracion di Dia di Piscado na e pier y centro na Palm Beach, Noord. Ademas di un torneo di pesca cu hopi premio atractivo, lo tin un festival di cuminda crioyo, actividad pa mucha y mas cu claro e bar a la piscado e biaha aki. Mas cu claro e ambiente tipico di piscado, cu musica crioyo y ambientoso na man di Jeo 297, lo deleita un y tur henter dia. Lo tin homenahe na baluartenan di mundo di piscamento conforme e tradicion di Hadicurari y varios sorpresa mas.
CAPTAINS MEETING:
Tur miembro di Hadicurari y doño di boto y piscado en general ta ser invita pa atende e reunion di capitan, unda lo habri e inscripcion y alabes repasa e reglanan den un ambiente sumamente yen di goso di piscado pa cual Hadicurari ta conoci p’e. E torneo ta conta e biaha aki cu mas di 5000 florin na premio pa tanto categoria “open all tackle” como categoria “tradicional crioyo”. E prome tripulacionnan cu bin cu nan capitan diabierna otro siman lo yega na remarke pa henter e team ricibi un pakete di participacion cu nan participacion na e torneo. Pesey percura reserva di awor caba e diasabra anochi 30 di juni pa 8’or pa capitan y tripulacion yega na Nos Clubhuis na Centro di Pesca Hadicurari.
