Diasabra anochi Polisnan a wordo manda pura den direccion di The Mill. A drenta informacion cu tin un turista halto halto bou influencia di sea alcohol of droga causando un desaster den un camber.
Entre otro el a kibra glas den e camber di e hotel. Na yegada di Polis a haya e homber Mericano cu no tabata razona. Fuera di a comete daño na e camber di hotel, e turista aki tambe a kibra varios auto parti pafo di e otro turistanan.
Polisnan a logra domine mesora. Asína a pone na boei y bay cune na entrada di e hotel. Eynan mester a scucha un cantidad di insulto contra nos hendenan entre otro miembronan di cuerpo policial.
Autoridad a controla nan mes. Aparentemente e turista tabata bezig caba cu su locura. E mes ta admiti di a dal e Droga Acid y nunca mas e lo dal esaki. “I’m never taking acid ever again,” el a remarca. E tabata bisa Polis cu e tin un amigo miyonario y tin 99% di e Polisnan cumpra.
A pidi presencia di dogcatcher cu a presenta y asina a bay cu e homber warda. Na warda e lo haya un camber cu cama di beton pa sosega. Despues e lo mester bay atende cu e daño cu el a comete den e camber di e hotel. E turista Mericano aki a laga un imagen negativo atras pa otronan cu si ta bin disfruta sanamente di nos isla.
