Tabata alrededor di 10:50 pm cu polis a presenta cu urgencia na rotonde Las Americas p’un homber sangrando profuso. Na yegada, polis a bin topa un homber cubri completamente den sanger.
Su man banda drechi tabatin un corta basta profundo. Cu urgencia a pidi pa presencia di ambulance. Na prome instante no tabatin mucho claridad riba e situacion, a kere cu ta trata di un accidente, despues a resulta cu ta trata mas bien di un posibel caso di pelea.
Un rato despues a tuma nota di e porta di Cas di Cultura completamente destrui, glas kibra y gespart tur caminda. Plas di sanger dilanti e porta y e parti dilanti cubri completamente cu sanger. Cu poco polis na sitio, a cuminsa traha cu e homber turista mientras e tabata perde hopi sanger.
Debi cu tabatin mas asistencia cu tabata rekeri presencia di ambulance, a tarda un rato prome cu e prome paramedico a yega na sitio. Na final a transport’e pa hospital caminda a brind’e atencion medico avansa. Tur cos ta mustra cu ta trata di un pelea, mirando cu varios testigo a declara cu a scucha zonido basta fuerte.
