Awe mainta a yama Ambulance pa un turista cu a haya un accidente riba Avenida Nelson Oduber, antes Sasakiweg na altura di Divi Links. E chauffeur femenino a conta na e sitio cu su helm tabata molesti’e, pa cual el a bay purba drech’e. Den e proceso, el a perde control riba e vehiculo, dal den un palo di luz y despues bolter banda di caminda. E señora turista a resulta levemente herida.
Polis no a presenta mes na e sitio di accidente y Ambulance mes mester a cera caminda pa autonan no dal e victima cu tabata banda di e vehiculo ATV gebolter riba caminda. Paramediconan a brinda asistencia na e sitio mes y no tabata necesario pa transporta e victima pa Hospital.
Ta algun taxista cu a pasa y mira con el a bay den scual cu e vehiculo y bolter, a baha pa yud’e mesora. Mester menciona cu e cantidad di accidentenan cu e tipo di vehiculonan aki ta aumentando tur dia bay, dunando un indicacion cla cu, sea e chauffeurnan no ta apto pa maneha nan of nos camindanan no ta prepara pa e tipo di vehiculonan asina.
