Polis a presenta na crusada peligroso na Palm Beach pa un accidente entre dos vehiculo. Na yegada a bin topa cu un Toyota Yaris y un Kia Rio den e greppel. Mirando cu a cay den e parti cu tin awa, tur ocupante a baha di biaha.
Esaki a tuma luga den careda di 8:15 am na e particion di e highway. Segun por a compronde na e sitio, cu e chauffeur di e Toyota Yaris biniendo di pazuid, lo a perde control y cuminsa baha caminda na su man drechi, a logra recobra control pero a maniobra di golpi pa e otro banda y cu consecuencia cu el a bay dal den e vehiculo na su banda robes.
Ambos vehiculo a bay cay den e greppel. Pa locual ta trata e KIA Rio, tabatin 4 ocupante entre nan dos mucha menor di edad cu a logra baha di auto. Ningun di nan a resulta herida, ta solamente e susto cu nan a pasa aden. Ambulance a presenta pa atende cu tur esnan envolvi, incluyendo chauffeur di e Yaris, pero na final no tabatin herido. Locual cu si por constata ta hopi daño material.
