Tur cos ta cla. E disfraznan ta cla, e candidatanan ta cla pa nan representa nan grupo, p’asina pueblo cerca conoci na final di e anochi, kendenan lo t’e diferente reinanan cu lo ta scogi pa representa Aruba su Carnaval 69.
Segun Susan Kelly-Boekhoudt, kende ta forma parti di comision di reina di Aruba su Carnaval pa SMAC, e ambiente ta hopi bon durante e tiramento di lot. Tabatin fanatico masha grandi cu ta bin pa compaña nan reinanan p’asina nan haya sa den ki secuencia nan lo aparece diasabra awo.
A cuminsa cu e grupo di infantil, caminda cu lo tin tres participante. E fanaticonan a drenta paden y a presencia e tiramento di lot na sede di SMAC, cu a bay den un ambiente hopi great, bao animacion di Alberto Groeneveld.
E muchanan a coy nan number y asina a haya sa ki number cada un nan tin pa representa diasabra awo.
Asina cu a caba cu e parti infantil, a sigui cu esun hubenil, yamando e fanaticonan paden. Den hubenil tabatin cuater candidata y nan a tuma nan number pa diasabra awo.
Pa loke ta ticket, e candidatanan mes tin esey cu por cumpra cerca nan na un prijs mas barata of si no ta cumpra na porta of tambe riba pay.aw pa diasabra awo.
Ta habri porta pa 5:00 pm y e show ta cuminsa pa 6:00 pm. Pa diadomingo, e porta ta habri pa 6:00 pm y show ta cuminsa pa 7:00 pm.
Cada reina lo tin nan kavel. Ta spera pa tur hende yega trempan pa nan sa cua kavel nan ta representa.
Kelly-Boekhoudt ta invita henter Aruba pa invita e candidatanan cu ta representa e diferente grupo of scol. Bin wak nan show, pasobra e lo ta un atardi inolvidabel, tanto riba diasabra como diadomingo.
Pa mas detaye lesa TREMPAN.
