Diahuebs atardi den un ambiente carnavalesco, e front di Tsunami a haci un presentacion na mas o menos binticinco pashent di dialyse. Mirando cu no ta facil pa nan bay mira Carnaval, e departamento encarga a haci tur lo posibel pa Carnaval yega cerca nan.
Raysa Vrolijk, hefe suplente di e departamento, a duna di conoce cu den un tempo cortico nan a organisa un evento pa e pashentnan. A logra haci e evento posibel den mas o menos diestres dia. “Tabata un bunita gesto y cooperacion di parti di varios cantante di Tsunami”, Vrolijk a menciona. Daddy Bass, Rasta, Easy B y Galloway a duna nan miho pa anima e pashentnan di dialyse. Soca King, Casper, tambe tabata presente.
Pa cera e anochi a busca Massive Brasband pa cera cu toke carnavalesco. Reina grandi Adrianne Jacobs, y segundo finalista di reina infantil Wesciënny Frances Feliz tambe a gosa durante e anochi. Departamento di dialyse ta sumamente agradecido na tur cu a acepta e invitacion y haci e anochi ‘ki uno inolvidabel.
Ta prome biaha cu ta organisa un evento carnavalesco pa e pashentnan. E idea tras di esaki ta pasobra no ta facil pa nan por bay mira un parada di Carnaval. Durante e celebracion aki, e pashentnan mes a vota pa Prins y Pancho y tambe nan Reina cu a resulta den Prins Santiago cu Pancho Earl y e Reina di dialisis Natacia. Jacco Vroegop y Gregory Croeze di hunta di directiva a corona reina y tambe e prins cu pancho di dialisis.
Mas o menos binticinco pashent tabata presente durante e celebracion. E pashentnan a bay cu nan famia. Pa e departamento ta importante pa celebra cu nan mirando cu nan ta pashent cu ta tuma tratamento tres biaha pa siman.
Pa termina, Vrolijk, su mensahe ta pa gosa den un manera sano cu salud na prome luga, Semper purba yuda esun cu tin menos recurso.
