Presenta pa cerbes Chill y Stichting Musica: Banda di aña lo gana 5 mil florin!

Cerbes Chill y Stichting Musica ta anuncia e oportunidad pa e bandanan musical sali “Band of the Year 2023” pa e temporada Carnavalesco.  

E criteria pa por cualifica pa “Band of the Year 2023” ta a base di experiencia di e añanan anterior, hunto cu e miembronan di Stichting Musica, pa asina eligi e banda cu a contribui mas na Carnaval en general pa 2023. 

Cada criteria tin un balor specifico y ta lo siguiente: 

1. E banda mester a participa na “Aruba Caiso & Soca Monarch 2023” y/of den “Festival di  Tumba 2023” 

2. E banda mester a participa entre e siguiente parada nan di Aruba su Carnaval 2023 (no  ta necesario pa a participa na tur parada):  

– Parada di Luz na San Nicolas 

– Lighting Parade Oranjestad 

– Parada di Jouvert Morning 

– Parada Grandi di San Nicolas 

– Grand Parade Oranjestad  

3. E banda cu miho animacion den paradanan 

4. E banda su zonido 

5. Presentacion di e banda su trailer den e paradanan 

6. Mester toca e Soca ganador di Aruba Caiso & Soca Monarch 2023 “Feelin Good, Feelin  Nice” of e Tumba ganador 2023 “Ata mi Aki” 

Lo tin un panel di hurado cu ta cubri e ruta di e paradanan aki ariba menciona. E premio pa “Band of the Year  2023” ta Awg 5.000,00.  

Dialuna 20 di februari, pa 3:00pm lo anuncia e banda ganado, pa medio di un comunicado dirigi na e radio emisornanan y tambe lo public’e riba e pagina di Facebook di Stichting Musica www.facebook.com/Stichtingmusica.  

Stichting Musica semper ta habri pa innovacion y pa cambio unda cu ta necesario y cu ta beneficia tur e musiconan. E organisacion y directiva di Stichting Musica ta hopi orguyoso di por brinda e premio “Band of  the Year 2023”.