Atletanan Sophie-Marie Solognier y Ji-zion Boekhoudt un biaha mas a biaha pa Corsou pa participa den 60m y 400m sprint den un otro edicion di Trupial Classic. Mester remarca cu ambos atleta ta tuma nan deporte hopi na serio y ta participa na nan trainingnan tur siman pa asina mantene y mehora nan mes den nan caredanan.
Actualmente Ji-zion Boekhoudt tin solamente 5 aña di edad y ta lidera den su categoria na Aruba y a dicidi di reta su mes un biaha mas na e Trupial Classics 2023 na Corsou. Como resultado Ji-Zion Boekhoudt a logra prome lugar den ambos 60 meter sprint como tambe den 400 meter kibrando su PR. Aña pasa tambe Ji-zion a participa na Trupial Classic pero a sali cortico pa premiacion terminando na di cinco luga. Cu dedicacion, consistencia y determinacion Ji-zion a sa di bin bek y gana ambos categoria.
Sophie-Marie Solognier di apenas 6 aña un biaha mas ta logra gana pa su team di Aruba. E biaha aki logrando medaya di silver den 400 meter. Mester remarca cu den 400 meter ambos Boys y Girls a start pareu y Sophie a sali overall di 3 luga den e mix aki. Sigur un tremendo performance y naturalmente kibrando su PR. Aña pasa Sophie-Marie tambe a participa den Trupial Classic obteniendo di 3 luga den 400meter.
Ambos atletanan ta forma parti di Aruba Malmok Runners y ta gradici Coach Jovita y Coach Beto Maduro pa nan tempo y dedicacion den e muchanan.
Masha pabien na ambos atletanan y laga e dos atletanan aki ta un ehempel y inspiracion pa muchanan y mayornan. Dedicacion di mayor na yiu ta fundamental pa desaroyo sano di e muchanan.
