Recientemente e lider di fraccion di MEP den Parlamento, drs. Shailiny Tromp-Lee a pidi cabes di un miembro di Algemene Rekenkamer Aruba (ARA). E tempo ey a manda un carta pa minister-president y a subraya e rol integro di miembronan di ARA. Pero, awor a pasa un situacion similar cu e director financiero di hospital, Gregory Croeze, pero awor parlamentario Tromp-Lee no ta papia e mesun idioma compara cu prome.
Ta algun dia pasa, cu durante un control rutinario di polis, dilanti Well Well Bar na Santa Cruz, a para e director financiero di Dr. Horacio E. Oduber Hospital. Durante e control polis a haya suficiente holor di alcohol sterki, cu a opta pa lag’e supla. E test a sali malo p’e, pa cual a deten’e na e sitio mes y a transport’e pa ward’i polis pa present’e dilanti un sub-fiscal. Na e momento ey e director di hospital, Jacco Vroegop no tabata na Aruba, pues Croeze tabata director general di nos hospital.
Despues di algun dia, Croeze a dicidi di publica su banda di medaya riba red social. El a admiti di tabata burachi tras di stuur, pero e ta kere cu el a dal net un cerbes di mas. El a disculpa su mes pa e sucedido y a sigura di lo ta mas cuateloso den futuro.
Detencion Frederick Nuboer
Tabata na october 2021 ora cu polis a detene miembro di Controlaria General, Frederick Nuboer dilanti di Burger King den Kamerlingh Onnestraat. E trahadonan a bati alarma na polis p’un homber burachi y fastioso. Na yegada di polis, a topa cu Frederick Nuboer bou influencia y a lanta cu e trahadonan di Burger King. Polis na nan turno a deten’e y transport’e pa ward’i polis pa ta burachi riba caminda publico.
No a dura mucho cu riba dia 18 di october 2021, lider di fraccion di MEP, drs. Shailiny Tromp-Lee a manda un carta pa Prome Minister, caminda a urgi e prome mandatario pa tuma pasonan necesario contra Nuboer, p’asina garantisa integridad y bon nomber di Controlaria General. Nuboer tabata vice-presidente di Controlaria General.
E tempo ey, Tromp-Lee a para hopi fuerte riba e punto di integridad, caminda a hasta menciona cu: “Nuboer mester ta bon consciente di su rol como un miembro di un Hoge College van Staat.” A dura net algun ora, cu Frederick Nuboer mes a entrega su peticion di retiro na gobernador, drs. Alfonso Boekhoudt.
Detencion Gregory Croeze
Riba 23 di april 2022 polis a detene Gregory Croeze pa stuur auto bou influencia di alcohol. Ta durante un control di trafico, ora cu polis a para Croeze y haci un test di alcohol cu ne. El a bebe suficiente alcohol pa a surpasa e limite permiti cual ta 220 UG/L. A detene Croeze y transport’e pa ward’i polis. Gregory Croeze apart di ta director financiero di hospital, e ta forma parti di Hunta di Supervision di Aruba Ports Authorithy (APA) y di Aruba Tourism Authority (ATA).
Mesun responsabilidad pero castigo diferente
Ora a kere cu drs. Shailiny Tromp-Lee (MEP) lo aplica e mesun postura cu el a haci cu Nuboer, a nota un cambio di 180 grado. Awe tardi Tromp-Lee, lider di fraccion di MEP a yega Aruba fo’i St. Maarten despues di un biahe di trabou. E tabata na St. Maarten relaciona cu reunion di IPKO. Na su yegada a acerc’e p’asina scucha su opinion riba e incidente di Gregory Croeze. E parlamentario di MEP ta di opinion cu no por compara Nuboer cu Croeze. Croeze ta traha pa un fundacion, esta hospital kende tin su propio Raad van Toezicht (RvT), cu otro palabra, parlamento no tin nada di bisa eyden. Tromp-Lee tabata masha corto den su contesta, mirando cu manera menciona, Croeze ta forma parti di dos hunta di supervision, unda gobierno ta accionista mayoritario di ambos, esta APA y ATA. Tromp-Lee a conseha 24ora.com pa puntra Hunta di Supervision di hospital riba e funcionamento di Gregory Croeze y ki medida nan lo tuma contra dje.
Raad van Toezicht di Dr. Horacio E. Oduber
Raad van Toezicht di dr. Horacio E. Oduber Hospital tabata consisti di cinco miembro, tres miembro, un presidente y un vice-presidente. Pero e mahyoria a tuma nan retiro y ainda no tin reemplasante. Por corda cu Gobierno a pensa di inclui ex-minister Andin Bikker y e comerciante Ronald van Trigt, pero ambos a nenga e posicion aki. Marco van den Burg ta presidente y ta conta cu por lo menos un miembro activo mas, esta abogado mr. Arlene Ellis-Schipper, kende ta traha tambe como consehero legal di Minister Dangui Oduber. De facto, parlamento a tira e batata cayente den scochi di Van den Burg y Schipper, pa nan dos dicidi kico lo sosode cu Croeze.
Mester menciona cu e pareha di Greg Croeze ta traha na Ministerio di Turismo y Salubridad Publico, pa colmo. E echo cu Greg Croeze ta hinca den dos otro board di Minister Oduber y su pareha ta traha cu e mandatario, ta mustra e relacion estrecho entre nan. Y ta esey mes awor ta riba mesa awor, e pregunta cu si bo ta cerca di un minister, lo bo haya un trato diferente y preferencial ora bo faya na bo trabou y responsabilidad y di mester desprestigia e funcion cu bo ta ocupa.
E locual ta hala atencion di hopi hende ta, cu Marco van de Burg recientemente a cuminsa traha na un compania di seguro. Ta cuestiona si ora un chauffeur causa accidente burachi, si e compania lo paga of no, pasobra ta parce cu ora e ta den Raad van Toezicht e tin un maneho masha tolerante pa chauffeurnan burachi. E otro miembro, Arlene Ellis-Schipper ta den hunta di supervision di un banco. Esey ta masha coincidencia pasobra ta algun siman pasa cu director di Aruba Bank a hay’e ta pidi retiro pa motibo cu tabata stuur auto betra. Ta straño e ora cu un banco ta pone integridad asina na halto y ta tuma medida contra nan mesun director si ta necesario como ehempel pa tur otro, siendo cu e mesun hunta di supervision ta permiti pa den otro funcionnan clave den comunidad si por “kijk door de vingers”.
Minister di Integridad?
Pronto lo acerca e minister encarga cu integridad, Ursell Arends riba e topico aki. Mirando cu parlamentario Tromp-Lee a demostra cu integridad ta conta pa algun hende si y algun no. Por lo menos MEP ta hopi critico y cla pa bula cabes di otronan cu kisas no ta liga na nan partido pero ora e storia bolter, ta opta pa laba man y tir’e den scochi di hospital mes bek.
